यात्रुलाई असहज महसुस हुन दिन्नँः मन्त्री आले


काठमाडौं– त्रिभुवन अन्तर्राष्ट्रिय विमानस्थलमा कुनै पनि यात्रुलाई कुनै असहज हुन नदिने संस्कृति, पर्यटन तथा नागरिक उड्डयनमन्त्री प्रेमबहादुर आलेले बताएका छन् । सोमबार त्रिभुवन अन्तर्राष्ट्रिय विमानस्थलमा छड्के अनुगमनमा निस्किएका मन्त्री आलेले विमानस्थलमा भएका अनियमितताको अन्त्य गर्ने र विमानस्थलमा यात्रुलाई कुनै असहज हुन नदिने विश्वास दिलाएका हुन् ।

अनुगमनका क्रममा विमानस्थलमा ट्याक्सीले मिटरमा यात्रु नबोक्ने, सरसफाइ नभएको, यहाँका पसलले यात्रुलाई चिया, कफीमा समेत महँगो लिने गरेका, कर्मचारीले पनि आफ्नो जिम्मेवारी पूर्णरूपमा पालना नगरेको पाइएकाले ती कमी कमजोरीको अन्त्य गर्ने बताएका छन् । यसैगरी मन्त्री आलेले आइतबार काठमाडौंबाट भोजपुरका लागि उडेको नेपाल वायुसेवा निगमको जहाजले केही यात्रु उडाएको र केही यात्रु छाडेकाले सो विषयमा नेपाल वायुसेवा निगमका निर्देशकलाई लिखित जवाफ माग गरेको बताए ।

भोजपुर जाने जहाजमा आधा यात्रु लगिएको र आधा छाडिएको भन्दै कसरी त्यस्तो हुन गयो, गल्ती गर्नेलाई कारबाही गर्न निर्देशन दिएको उनले बताएका छन् । यात्रुसँग निगमसँगको सम्बन्ध सुमधुर होस् भन्ने आफ्नो चाहना रहेको उनले बताएका छन् । आइतबार छुटेका यात्रुलाई पनि मन्त्री आलेकै निर्देशनमा सोमबार गन्तव्यमा पु¥याइएको छ । मन्त्री आलेले नेपाल वायुसेवा निगमलाई हवाइ टिकटका लागि इ–टिकेट (अनलाइन) को व्यवस्था गर्न निर्देशन दिएकाले निकट भविष्यमै ई–टिकेट सञ्चालन हुने विश्वास दिलाए ।

मन्त्री आलेले आफू पदमा रहुन्जेलसम्म नेपाल वायुसेवा निगमलाई माथि उठाउन लाग्ने बताएका छन् । अवका दिनमा अन्तर्राष्ट्रिय विमानस्थलमा यात्रुले कुनै पनि समस्या भोग्नु नपरोस् भनेर मन्त्री आलेले कर्मचारीलाई निर्देशन दिए । त्रिभुवन अन्तर्राष्ट्रिय विमानस्थलमा जहाज पार्किङका लागि निकै साँघुरो तथा असहज भएकाले यहाँका जहाज धनगढी, नेपालगन्ज, पोखरा, भैरहवा, विराटनगरलगायत विमानस्थलमा पार्किङको व्यवस्थाका लागि पहल भइरहेको बताए । जहाज पार्किङका लागि समस्या भएको भन्दै जहाज बिहानको समयमा अन्य ठाउँबाट पनि उडान गर्न सक्ने गरी पहल भइरहेको उनले बताएका छन् । नेपाल वायुसेवा निगमका कर्मचारीले यात्रुसँग रुखो व्यवहार गर्ने यात्रुले मन्त्री आलेसमक्ष गुनासो गरेका थिए ।

Published On: Time : 6:28:49  

तपाईको प्रतिक्रिया