‘ए’ डिभिजन फुटबल लिग रोक्न ज्ञापनपत्र


काठमाडौं — आसन्न ‘ए’ डिभिजन लिग फुटबल रोक्न माग गर्दै चार क्लबले ज्ञापन पत्र बुझाएका छन् । असोज ३ गतेका लागि तय ‘ए’ डिभिजन लिग रोक्न माग गर्दै चार क्लबले अखिल नेपाल फुटबल संघ (एन्फा)लाई ज्ञापन पत्र बुझाएका हुन् ।

कोभिडको भयावह स्थितिका कारण लिग आयोजना गर्न कुनै हालतमा उपयुक्त नदेखिएको भन्दै चार क्लबले संक्रमण दरमा अत्याधिक कमि आएपछि मात्र लिग सञ्चालन गर्नुपर्ने बताएका हुन् ।
‘ए’ डिभिजन क्लबहरू जावलाखेल युथ क्लबका अध्यक्ष गहेन्द्र क्षेत्री, फ्रेन्ड्स क्लबका अध्यक्ष दिपक थापा, ब्रिगेट ब्वाइज क्लबका अध्यक्ष लालकुमार पुन र थ्री स्टार क्लबका महासचिव सञ्जिव सिल्पकारले एन्फा महासचिव इन्द्रमान तुलाधरलाई भेट गरि ज्ञापन पत्र हस्तान्तरण गरेका थिए ।

गत असार १४ गते एन्फामा भएको ‘ए’ डिभिजन क्लबको बैठकले सहिद स्मारक लिग असोज ३ गतेबाट सञ्चालन गर्ने निर्णय गरेको थियो । आसन्न लिगका लागि अधिकांश क्लबले खेलाडी अनुबन्धको कामलाई अन्तिम चरणमा पु¥याएका छन् । तर चार क्लबले निर्धारित मितिमा लिग खेल्न नसकिने भन्दै एन्फालाई ज्ञापन पत्र बुझाएका हुन् ।

एन्फाले साउन १० गतेभित्र टिम दर्ता गर्न ‘ए’ डिभिजन क्लबलाई अनुरोध गरेको थियो । एक पक्षिय रूपमा टिम दर्ता सम्बन्धि पत्र पठाईएको भन्दै चार क्लबले बिरोध जनाएका छन् । उनीहरूले ‘ए’ डिभिजनका क्लबको यथाशिघ्र बैठक बोलाउन माग समेत गरेका छन् । टिम दर्ताका लागि एन्फाले गरेको आह्वानमा आफ्नो असहमती रहेको चार क्लबको दाबी छ ।

Published On: Time : 3:46:58  

तपाईको प्रतिक्रिया