गठबन्धन टुटाउने खेल भइरहेको दाबी


काठमाडौं– वर्तमान सरकारको गठबन्धन टुटाउने गरी खेल भइरहेको नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहालले बताएका छन् । जसपा र एमालेबाट माओवादी केन्द्रमा आएका एकदर्जन नेता तथा कार्यकर्ताको आफ्नो निवास खुमलटारमा पार्टी प्रवेश गराउँदै दाहालले यस्तो बताएका हुन् ।
उनका अनुसार नेकपा एमालेका अध्यक्ष केपी ओलीलाई मद्दत गर्नेहरू एमसिसीमार्फत गठबन्धनलाई टुटाउने कसरत भइरहेको छ । एमसिसीमार्फत वर्तमान गठबन्धनलाई टुटाएर फेरि प्रतिगमनमा लैजान कसरत भइरहेको अध्यक्ष दाहालले बताए ।
कार्यक्रममा अध्यक्ष दाहालले भने, ‘हिजो संसद विघटन गरेर केपी ओलीलाई मद्दत गर्नेहरू एमसिसीमार्फत गठबन्धनलाई टुटाएर फेरि प्रतिगमनमा लैजान सकिन्छ कि भनेर कसरत गरिरहेका छन् ।’ उनले अगाडि भने, ‘हामीले गठबन्धनमा एमसिसी र गठबन्धन कुन मुख्य हो भनेर छलफल पनि गरेका छौँ । गठबन्धन रक्षा नै राष्ट्र, संविधान र गणतन्त्रको हितका लागि मुख्य हो । एमसिसी परिमार्जन र संशोधनबिना पास गर्न सकिन्न र राष्ट्रिय सहमति नबनाई यस्तो डरलाग्दो कुरामा हात हाल्न पनि हुन्न ।’
उनले माओवादी आन्दोलन र यसले उठाएका एजेन्डालाई राष्ट्रिय रूपमा फेरि नयाँ उचाइँबाट स्थापित गर्ने तथा आन्दोलन र पार्टीलाई फेरि राष्ट्रको नेतृत्व गर्ने गरी विकास गर्ने अवसर आफूहरूमा रहेको उनले बताएका छन् । उनले भने, ‘समाजवादी क्रान्तिलाई मार्क्सवादी तरिकाले अगाडि बढाउने पार्टीको रूपमा यो पार्टी र नेतृत्वका लागि अन्तिम अवसर पनि हुन सक्छ । एक चोटि राष्ट्रलाई झक्झक्याएर अगाडि लैजाने अवसर पनि हुन सक्छ । सकिएन भने नराम्रो स्थितिमा आन्दोलन जाने खतरा पनि छ । त्यस कारण सबै क्रान्तिकारीहरूले अब ढिला नगरी एकताबद्ध हुने र आत्म समीक्षासहित जनताको घरघरमा पुग्नुपर्ने भएको छ ।’
एक हप्ताभित्र सरकारमा
यसैबीच, नेकपा एकीकृत समाजवादीका अध्यक्ष माधवकुमार नेपालले आफूहरू एक हप्ताभित्र सरकारमा सहभागी हुने बताएका छन् । आइतबार पोखरामा आयोजित कार्यकर्ता भेलालाई सम्बोधन गर्दै अध्यक्ष नेपालले केन्द्रसँगै लुम्बिनी प्रदेश सरकारमा पनि सहभागी हुने तयारी भइरहेको बताए ।
‘पहिले आसेपासेलाई लगेर नियुक्ति गरियो । क्षमता नभएका, अनुचित काम गर्नेलाई पनि पठाइएको थियो । आफूसँग असहमत भएकाहरूको मानमर्दन गर्न पठाइएको थियो, अब ती सबैबाट मुक्त भएर हामी समुचित ढंगले व्यवस्थापन गर्दै छौ,’ उनले भने ।
उनका अनुसार प्रदेश १ र वागमतीमा सरकार परिवर्तनको तयारी गरिरहेको सुनाएका छन् । ‘१ र ३ नम्बर प्रदेशमा पनि केपी ओलीका प्युसोहरूको सरकार छ । अब त्यहाँ एक हप्ताभित्र सरकार हटाएर हामी सरकारमा जान्छौँ,’ उनले भने ।
गण्डकी प्रदेशमा भने ‘हिजैबाट’ आफूहरूलाई भेद्भाव गरिएको उनले बताएका छन् । ‘गण्डकी प्रदेशमा हिजो हाम्रा पक्षका साथीहरूलाई जुन भेद्भाव गरियो, अन्याय गरियो, टिकटबाट वञ्चित गरियो । हामीलाई उठ्नै दिइएन, पीडित बनाइयो,’ एकीकृत समाजवादीका अध्यक्ष नेपालले भने, ‘यहाँ पीडितहरूको एकता भएको छ ।’
त्यस्तै, अध्यक्ष नेपालले भने एमालेको नाम सुनेर जनताले नाक खुम्च्याउने अवस्था आइसकेको टिप्पणी गरेका छन् । ‘आज देशको अवस्था किन यस्तो भयो ? एमालेको हविगत किन यस्तो भयो भनेर पहिल्याउनु पर्ने बेला भयो,’ एकीकृत समाजवादीका अध्यक्ष नेपालले भने, ‘अहिले एमालेको नाम लिनेबित्तिकै सबैले नाकमुख खुम्च्याउने गरेका छन् । जनताको नजरबाट तल खसिसकेको छ । यसको इज्जत प्रतिष्ठा गुमिसकेको छ ।’
ओलीले मनोमानी गर्न खोजेको भन्दै उनले त्यसको जवाफ जनताले दिने बताएका छन् । ‘सांसदहरूले मेरो आदेश मानेनन्, म सबैको कत्लेआम् गर्दिन्छु भनेर (संसदको) हत्या गरियो,’ संसद भंगप्रति लक्षित गर्दै उनले भने, ‘कतिपय देशमा यस्ता संविधानविरोधी काम गर्ने प्रधानमन्त्रीलाई सजाय दिइन्छ । हामीकहाँ पनि नेपाली जनताले सजाय दिँदै छन् ।’

Published On: Time : 1:57:24  

तपाईको प्रतिक्रिया