काठमाडौ– प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीले संयुक्तरूपमा मंगलबार एकीकृत भन्सार जाँचचौकीको उद्घाटन गरेका छन् । उनीहरूले भिडियो कन्फ्रेन्सबाट स्वीच अन गरेर संयुक्तरूपमा जाँचचौकीको उद्घाटन गरेका थिए ।
प्रधानमन्त्री ओलीले काठमाडौं र उनका समकक्षी भारतीय प्रधानमन्त्री मोदीले नयाँदिल्लीमा मंगलबार बिहान ११ः१५ मा रिमोट कन्ट्रोलबाट चौकीको उद्घाटन गरेका हुन् । सो अवसरमा प्रधानमन्त्री ओलीले एकीकृत भन्सार जाँचचौकीले नेपाल र भारतबीचको व्यापार विस्तार गर्न मद्दत पुग्ने बताउँदै यसबाट दुवै देशको आर्थिक विकासमा सहयोग पुग्ने धारणा राखे ।
प्रधानमन्त्री ओलीले नेपालले भारतसँग विकासमा साझेदारी गर्न चाहेकामा पनि जोड दिए । उनले भारतीय समकक्षी मोदीलाई नेपाल भ्रमणका लागि निम्तो समेत दिएका छन् । नेपाल भ्रमण वर्ष समेत रहेको प्रम मोदीले आफ्ना समकक्षी मोदीलाई नेपाल आउने निम्तो दिएका हुन् ।
भिडियो कन्फ्रेन्सबाटै भारतीय प्रधानमन्त्री मोदीले नेपालको शान्ति, अखण्डता र समृद्धिको कामना गरेका छन् । नवनिर्मित चौकीले व्यापार, संस्कृति र शिक्षा क्षेत्रमा सुगमता ल्याउने विश्वास गर्दै प्रधानमन्त्री मोदीले गोरखा भूकम्पबाट भत्किएका निजी घरको पुनर्निर्माणमा भारत सरकारले निरन्तरता दिने विश्वास दिलाए । प्रधानमन्त्री मोदीले नेपाल भ्रमणको निम्तो पनि स्वीकार गरे ।
कार्यक्रममा उद्योग, वाणिज्य तथा आपूर्ति राज्यमन्त्री मोतीलाल दुगडले नवनिर्मित चौकीले नेपाल भारतबीचको व्यापारमा अत्यन्त सुविधा पुग्ने तथा नेपालमा उत्पादन लागत कम हुने र रोजगारी एवं व्यापारमा सुगमता आउने धारणा राखेका थिए ।
एकीकृत भन्सार जाँचचौकी मंगलबारदेखि सञ्चालनमा आएपछि विराटनगर भन्सार कार्यालय छोटी भन्सार कार्यालय हुनेछ । विराटनगर भन्सार कार्यालयदेखि पूर्व भारत सिमानासँग जोडिएको बुधनगरमा सो चौकी १२९ बिघा क्षेत्रमा बनाइएको छ ।
प्रकाशित मिति: बुधबार, माघ ८, २०७६ ०५:१५
