काठमाडौं– सरकारले आफूहरूसँग गरेको सहमति कार्यान्वयन नगरेको भन्दै उखु किसान फेरि आन्दोलित भएका छन् ।
गत १८ पुसमा सरकार र उखु किसान संघर्ष समितिबीच भएको सम्झौतामा ७ माघभित्र सबै किसानको अघिल्लो वर्षको उखु बिक्रीवापतको रकम भुक्तानी गर्ने सहमति भएको थियो । तर, तोकिएको समयमा सम्झौताअनुसार चिनी उद्योगले भुक्तानी नगरेपछि किसान आन्दोलित भएका हुन् ।
भुक्तानीका लागि आज बिहीबारसम्म पर्खने र ठोस जवाफ नआए चरणबद्घ आन्दोलनको घोषणा गरेका छन् । बुधबार सर्लाही सदरमुकाम मलंगवामा पत्रकार सम्मेलनमार्फत आन्दोलनका कार्यक्रम घोषणा गरेका छन् । १० माघमा कृषकले कालोपट्टि बाँधेर काम गर्ने, ११ गतेदेखि १७ गतेसम्म किसान जागरण अभियान सञ्चालन गर्ने र १८ गते गोडैता बजारमा किसानको भेला गराई काठमाडौं केन्द्रित आन्दोलनको स्वरूप र मिति तय गरिने उखु किसान संघर्ष समिति सर्लाहीका अध्यक्ष रामस्वार्थ रायले बताए ।
सर्लाहीको बागदहमा रहेको महालक्ष्मी सुगर मिलले रु १० करोड, अन्नपूर्ण सुगर मिल धनकौलले ३५ करोड, श्रीराम सुगर मिल रौतहटले रु ४२ करोड र नवलपरासीको इन्दिरा सुगर मिलले रु ९ करोड भुक्तानी गर्न बाँकी रहेको छ । सोमबारसम्म सर्लाहीमा रहेको महालक्ष्मी सुगर मिल बगदहले ११ करोड ५० लाख, अन्नपूर्ण सुगर मिल धनकौलले तीन करोड ९० लाख र इन्दिरा सुगर मिल नवलपरासीले रु ७४ लाख रकम भुक्तानी गरेको छ ।
उखु किसानले उद्योगबाट पाउनुपर्ने रु एक अर्ब २० करोडमध्ये अहिलेसम्म जम्मा रु १५ करोड मात्र भुक्तानी पाएको उखु किसान सङ्घर्ष समिति सर्लाहीका अध्यक्ष उत्पादक महासङ्घका अध्यक्ष कपिलमुनि मैनालीले जानकारी दिए । सरकारले उखु किसानलाई दिने भनिएका प्रतिक्विन्टल ६५ रूपैयाँ ५६ पैसा पाएका छैनन् । अनुदानवापतको रकम एक अर्ब ३४ करोड अहिलेसम्म उपलब्ध नगरेको उनीहरूको गुनासो छ ।
