काठमाडौं– शिवपुरीस्थित नेपाली सेनाको आर्मी कमाण्ड एण्ड स्टाफ कलेजबाट २६औँ समूहमा १० विदेशीसहित ६३ ले ‘कमाण्ड एण्ड स्टाफ कोर्स’ पूरा गरी दीक्षित भएका छन् । प्रधानसेनापति पूर्णचन्द्र थापाले कलेजमा मंगलबार आयोजित समारोहमा कोर्स पूरा गर्ने प्रशिक्षार्थीलाई प्रमाणपत्र प्रदान गरेका हुन् ।
नेतृत्व तहमा पुग्ने सैनिक अधिकृतका लागि कमाण्ड एण्ड स्टाफ कोर्स अनिवार्य मानिन्छ । २०४९ मा स्थापना भएको उक्त कलेजबाट एक हजार ५३ ले उक्त कोर्स पूरा गरेको दीक्षान्त समारोहमा जानकारी दिएको छ । तीमध्ये विदेशी सैनिकको संख्या ८३ रहेको छ ।
करिब ५० साता अवधिमा यसपटक कमाण्ड एण्ड स्टाफ कोर्समा समग्र विधामा सेनानी चित्रबहादुर कार्की उत्कृष्ट घोषित भएका छन् भने यस कोर्सलाई त्रिभुवन विश्वविद्यालयले स्नातकोत्तरको मान्यता प्रदान गरेको छ । सो २६औँ समूहमा नेपाली सेनाका ५०, नेपाल प्रहरी, सशस्त्र प्रहरी बल र राष्ट्रिय अनुसन्धान विभागका एक–एक अधिकृत सहभागी थिए । बंगलादेश, चीन, भारत, लेवनान, माल्दिभ्स, नाइजेरिया, पाकिस्तान, दक्षिण कोरिया, श्रीलंका र संयुक्त राज्य अमेरिकाका पनि एक–एक सैनिक अधिकृत सहभागी थिए ।
प्रशिक्षार्थीलाई प्रमाणपत्र प्रदान गर्दै प्रधानसेनापति थापाले व्यावसायिक सैनिक संयुक्तरूपमा परिचालन हुँदाका बखत आइपर्ने चुनौतीलाई कसरी समाधान गर्ने भन्ने सन्दर्भमा प्रदान गरिएको ज्ञानको समुचित प्रयोग उदाहरण प्रस्तुत गर्न निर्देशन दिए । ‘अनुशासित व्यावसायिक सैनिकको रूपमा योजना बनाउँदै अघि बढाउन कलेजबाट प्राप्त गरेका ज्ञान कोसेढुंगा सावित हुनेछ, यहाँ प्राप्त भएको ज्ञानबाट उच्च र बहुआयामिक नेतृत्व बन्न योगदान पुग्ने छ’ उनले भने ।
त्रिभुवन विश्वविद्यालयका उपकुलपति प्राध्यापक धर्मकान्त बाँस्कोटाले २१औँ शताब्दीमा आउन सक्ने सुरक्षा चुनौतीको सामना गर्न कलेजबाट प्राप्त ज्ञानले सहज तुल्याउने विश्वास व्यक्त गरेका थिए । कलेजका प्रमुख एवं उपरथी ईश्वर हमालले कलेजबाट प्रदान गरिँदै आएको कोर्स र तालीमका बारे जानकारी गराएका थिए । साहीे अवसरका कलेजद्वारा प्रकाशित शिवपुरी जर्नलको पनि विमोचन गरिएको थियो । पछिल्लो समय उक्त कलेज विदेशी सैनिकको आकर्षणको केन्द्र बन्दै आएको छ ।
प्रकाशित मिति: बुधबार, फागुन १४, २०७६ ०६:१९
