भक्तपुर– करिब साता अघि चीनका वुहानबाट उद्दार गरिएर ल्याइएका विद्यार्थीहरू भक्तपुरको क्षेत्रपाटीस्थिति क्वारेन्टाइनमा राखिएका छन् । कोरोना भाइरस प्रभावित चीनको वुहानबाट उद्दार गरिएका १७५ जना नेपालीको उद्दारपछि क्वारेन्टाइनमा राखिएकाहरूको अवस्था कस्तो छ त ?
आज उक्त प्रश्नको जवाफ खोज्न क्वारेन्टाइनका रहेकाहरूसँग कुराकानी र रिपोर्ट प्रस्तुत गर्ने प्रयास गरिएको छ । चीनबाट उद्दार गर्नेवित्तिकै मिडियामा चर्चामा आएका यी सबै विद्यार्थीको आजसम्म स्वास्थ्य अवस्था ठीक रहेको छ भने क्वारेन्टाइनमा रहेका विद्यार्थीसमेत खुसी छन् । नेपाल सरकारले दिएको सुविधाप्रति खुसी रहेको क्वारेन्टाइनमा रहेका विद्यर्थीले बताएका छन् । केही दिनयता उनीहरूको कुरा मिडियामा नआएकाले जनमानसमा खोजी सुरु भएको थियो ।
त्यसैले सांसद महेश बस्नेतको टोलीले मंगलबार क्वारेनटाइन क्षेत्रको अनुगमन गरी चीनबाट फर्काइएका नेपालीसँग उनीहरूको अवस्थाबारे जानकारी लिए । सरकारले चीनबाट उद्धार गरी भक्तपुरको खरिपाटीस्थित क्वारेन्टाइनमा राखिएका नेपालीको बारेमा जानकारी लिन मंगलबार खरीपाटी पुगेका सांसद बस्नेतले क्वारेन्टाइनभित्र रहेका नेपालीसँग त्यहाँको अवस्थाबारे जानकारी लिएका थिए ।
उनले क्वारेन्टाइनबाहिर संयुक्त सुरक्षाको कमाण्डमा रहेको कन्ट्रोल कक्षबाट माइकमार्फतभित्र रहेका नेपालीसँग सिसी क्यामराको माध्यमबाट भिडियो हेर्दै कुराकानी गरेका थिए । सोक्रममा भित्र रहेको विद्यार्थीले आफूहरू खुसी र ठीक रहेको बताएका थिए ।
सांसद बस्नेतसँगको कुराकानीमा क्वारेन्टाइनमा रहेका नेपालीहरूले सरकारले गरेको व्यवस्था सन्तोषजनक रहेको समेत बताए । उनीहरूले भने, ‘हामी यहाँ सुरक्षित छौँ, हामीलाई आवश्यक परेको कुनैपनि सामान तुरुन्तै पाउने गरेका छौँ यहाँ भएकाका परिवारले कुनै चिन्ता लिनुपर्दैन, हामी खुशी छौँ ।’
सांसद बस्नेतसँग उनीहरूले यहाँबाट निस्किएर परिवारसँग भेट्ने दिनमा सरकारी निकायका व्यक्ति, जनप्रतिनिधिनै आएर बिदाइ गरी देशभर सकारात्मक सन्देश फैलाउने व्यवस्था गरिदिन पनि आग्रह समेत गरे । क्वारेन्टाइनमा रहेका चीनबाट फर्किएका नेपालीले सरकारले गरेको व्यवस्थाप्रति खुशी भएको र यहाँको अवस्थामा कुनै पनि चिन्ता लिनुपर्ने र आत्तिनुपर्ने अवस्था नरहेको पूर्वमन्त्री एवं सांसद बस्नेतले बताए ।
उनीलाई नेपाली सेना वीरदल गणका गणपति कर्नेल शिव पौडेलले यहाँको अवस्थाबारेमा जानकारी गराएका थिए । भक्तपुरका प्रमुख जिल्ला अधिकारी होमकला पाण्डेले भित्र रहेका नेपालीबाट कुनैपनि कुराको माग हुनेबित्तिकै सुरक्षाको नेतृत्व गरेका कर्णेल पौडेलले आफ्नै व्यक्तिगत खर्चसमेत गरेर भएपनि मागअनुसारको सामान पठाइदिने गरेको जानकारी गराएका छन् । उनीहरूलाई अब केही दिनसम्म क्वारेन्टाइनमा राखेर सार्वजनिक जिवनमा फर्काइने छ । अहिलेसम्म त्यहाँ रहेका कुनै पनि नेपालीमा भाइरस संक्रमण नदेखिएकाले केही दिनभित्रै उनीहरूलाई आ–आफ्नो घर पठाइने भएको छ ।
