- गत मंगलबार राति दुई नेताबीच बालुवाटारमा भेट भएको केही समय नबित्दै बिहीबार बिहान पुनः भेट
- नेपाली कांग्रेसले एमालेलाई जसरी पनि घेराबन्दी गर्ने लक्ष्य राखेको एमाले अध्यक्ष केपी शर्मा ओलीको भनाइ
- कुनै काम अगाडि नबढे आफूबाट अर्को उथलपुथल हुने र पदको सुरक्षाका लागि आफूले समीकरण नबदलेको प्रधानमन्त्री दाहालको स्पष्टोक्ति
काठमाडौं– सत्ता समीकरण बदलिएको अवस्थममा राजनीतिमा नयाँ तरंग आउनेगरी नेपाली कांग्रेसका सभापति शेरबहादुर देउवाले प्रधानमन्त्री पुष्पकमल दाहालसँग तारन्तर भेट्न थालेका छन् । गत मंगलबार राति दुई नेताबीच बालुवाटारमा भेट भएको केही समय नबित्दै बिहीबार बिहान पुनः देउवा–दाहालको भेट भएको छ ।
संसद्मा अड्किएका विधेयकलाई निरन्तरता दिन दाहालले देउवासँग छलफलका लागि भेट बाक्लो बनाएको प्रधानमन्त्री सचिवालयको दाबी छ । कांग्रेसले सहकारी ठगी प्रकरणमा गृहमन्त्री रवि लामिछानेको राजीनामा माग गर्दै सदनमा अवरोध जारी राखेको हुनाले संसद् खुलाउन भेट भएको बताइएको छ ।
तर प्रधानमन्त्री दाहालले बिहीबार राष्ट्रिय विकास समस्या समाधान समितिको बैठकमा जुनसुकै बेला उथलपुथल हुनसक्ने बताएका छन् । ‘कुनै काम अगाडि बढेन भने मबाट अर्को उथलपुथल गर्न बेर छैन । पदको सुरक्षाका लागि मैले समीकरण बदलेको हैन,’ दाहालले गण्डकीका मुख्यमन्त्री सुरेन्द्रराज पाण्डेलाई लक्षित गर्दै भने, ‘काम गर्न सकेन भने पद ओगटेर बस्नुहुँदैन । यसमा म सचेत छु । अरूलाई अप्ठेरो पार्ने खालको हैन । काम गर्न नसके पद ओगटेर बस्ने पक्षमा म छैन ।’ गण्डकीका मुख्यमन्त्री पाण्डेले कांग्रेस छाडेर दाहालले उथलपुथल गरेको आरोप लगाएका थिए ।
बैठकमा निराश सुनिए दाहाल
समस्या समाधान समितिको बैठकमा विभिन्न कारण देखाउँदै प्रधानमन्त्री दाहाल निराश सुनिए । उनले विकासका परियोजनाहरुका कारण ऋण भार बढ्दै गएको उल्लेख गर्दै बजेट बनाउनै मुस्किल भइरहेको बताए । ‘हामी दलदलमा फसियो भन्ने पनि लाग्छ यो बजेटका सन्दर्भमा । पुरानालाई पनि निरन्तरता दिए धानेर लानैपर्ने ।
राष्ट्रिय गौरवका योजनालाई पनि लानैपर्ने,’ दाहालले भने, ‘सबै मन्त्रालयलाई नयाँ–नयाँ योजना पनि थप्नैपर्ने । आउँदो वर्ष हामी ठूलो आर्थिक संकटमा झन् ठुलो दबाबमा हुने अवस्थामा हामी पुगेका छौं ।’पुँजीगत बजेट खर्च हुन नसकेकोमा प्रधानमन्त्री दाहाल सबैभन्दा चिन्तित देखिए । ‘चालु आर्थिक वर्षको आठ महिना कटिसक्दा पनि पुँजीगत खर्च ३० प्रतिशत पनि नपुग्नु चिन्ताको विषय हो,’ दाहालले भने ।
इलाम–२ मा हुन लागेको उपनिर्वाचनमा सत्ता गठबन्धन एक भएर जान सकेन । एमालेले संविधानसभा अध्यक्ष स्व. सुवास नेम्बाङका छोरा सुहाङलाई उम्मेदवारको रुपमा अघि सारेको छ भने सत्तामै रहेको राष्ट्रिय स्वतन्त्र पार्टी (रास्वपा)ले मिलन लिम्बूलाई । कतिपयले यो निर्वाचनमा माओवादीले कांग्रेसलाई साथ दिने तयारी रहेको दाबीसमेत गरेका छन् ।
दिल्लीमा आरजु, भेटको बहाना टिआरसीको
कांग्रेस सभापति देउवापत्नी आरजु राणा यतिबेला भारतको राजधानी नयाँदिल्लीमा पुगेकी छन् । आरजुले आफू उपचार गर्दै गरेको उल्लेख गर्दै आफ्नो फेसबुक पेजबाट फोटोसमेत सार्वजनिक गरेकी छन् । यद्यपि काठमाडौंमा राजनीतिक खिचडी पक्नुअघि नेताहरुको दिल्ली दौड पुरानै रोग भएको विश्लेषकहरु बताउँछन् ।
यहीबेला कांग्रेस सभापति देउवा बालुवाटार धाउन लागेका हुन् । प्रधानमन्त्रीको सचिवालयले बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग ऐन(टिआरसी) २०७१ लाई संशोधन गर्न बनेको विधेयक अघि बढाउन देउवासँग दाहालको भेट भएको दाबी गरेका छन् ।
यसअघि कांग्रेस नेतृत्वको सत्ता समीकरणका बेला पनि प्रधानमन्त्री र तत्कालीन प्रमुख प्रतिपक्ष दल नेकपा एमालेका अध्यक्ष केपी शर्मा ओलीबीच पटक–पटक भएका भेटवार्तामा टिआरसीबारे छलफल भएको थियो । तर टिआरसीकै कारण कांग्रेस सत्ताबाट बाहिरिनुपरेको थियो । एमालेसँग माओवादी केन्द्रको पुनर्मिलन हुने छाँट देखेपछि कानुन समितिबाट पारित हुने अन्तिम समयमा कांग्रेसले टिआरसी रोकेको थियो । टिआरसी देखाउँदै दाहालसँग भेट्न पुगे पनि देउवाको भित्री उद्देश्य सत्ताको उलटपुलट नै रहेको बताइएको छ ।
ओली सशंकित
एमाले अध्यक्ष ओली दुई नेताको तारन्तर भेटपछि सशंकित बनेका छन् । बिहीबार झापा पुगेर ओलीले अहिले बनेको सत्ता समीकरण स्वार्थसिद्धिका लागि नभएको बताएका छन् । एमाले झापाको ११औं जिल्ला अधिवेशन उद्घाटन गर्न विर्तामोड पुगेका उनले नेपाली कांग्रेसको नेतृत्वमा बनेको पूर्वगठबन्धनले एमालेलाई जसरी पनि घेराबन्दी गर्ने लक्ष्य राखेको बताए ।
त्यसैले अहिलेको गठजोड गठबन्धन नभएको ओलीले तर्क गरे । ‘यो समीकरणमात्र हो । गठबन्धन हैन । गठबन्धनको काम एमालेलाई कमजोर पार्ने थियो । हामी एक ठाउँमा छौं । गठबन्धन भन्ने गल्ती नगर्नुहोला साथीहरुले,’ ओलीले भने । कांग्रेस नेतृत्वले एमालेसँग मिलेर माओवादीलाई एकल्याउन चाहेको भए पनि ओलीले यस्तो मिलन हुनै नसक्ने दाबी गरे । ‘अमेरिकामा हेर्नुहोस्, त्यहाँ दुई पार्टी छन्,’ ओलीले भने, ‘चार वर्षमा चुनावी प्रतिस्पर्धा गर्छन् । दुवै दल मिलेर सरकार चलाएको त्यहाँ कुनै उदाहरण छैन ।’
ओलीले झापामा कांग्रेससँगको तुससमेत पोखे । ‘कांग्रेस थोत्रो पार्टी हो । लोकतन्त्रको बारेमा उसले हामीलाई फुर्तिफार्ती गर्नुपर्दैन,’ ओलीले भने । कांग्रेसले विगतमा एमालेप्रति निषेधको राजनीति गरेको जनाउँदै उनले एमालेले कहिल्यै पनि निषेध, हिंसाको राजनीति नगर्ने धारणा व्यक्त गरे । कांग्रेस संस्थापनइतरका नेता डा. शेखर कोइरालाले पनि बिहीबार आफ्नो कारणले माओवादीसँग कांग्रेसको सम्बन्ध बिग्रिएको आरोप सत्य नभएको बताएका छन् ।
सप्ताहिक पत्रिकाका सम्पादकहरुसँग आफ्नो सम्पर्क कार्यालय विशालनगरमा छलफलका क्रममा कोइरालाले उक्त आरोपको खण्डन गरेका हुन् । सत्ता प्राप्त हुन्छ भन्दैमा जोसँग पनि गठबन्धन गर्ने परिपाटी कांग्रेसले अन्त्य गर्नुपर्ने भन्दै सम्पादकहरुले कोइरालालाई सुझाव दिएका थिए । कोशीमा माओवादीका इन्द्र आङ्बोलाई मुख्यमन्त्री बनाउने निर्णय गठबन्धनले गरे पनि शेखरले भने केदार कार्कीलाई बागी बनाएका थिए । एमालेको सहयोगमा कार्की मुख्यमन्त्री बनेपछि संघीय गठबन्धनमा खटपट आएको थियो ।
