काठमाडौं– कोरोनाभाइरस (कोभिड–१९)को जोखिमबीच उपत्यकामा सवारी तथा मानवीय चाप बढ्न थालेको छ ।
सवारीसाधान झण्डै साविकको तुलनामा बढी सञ्चालन हुन थालेको छ भने ट्राफिक जामसमेत बढ्न थालेको पाइएको छ ।
बाहिरी जिल्लाका सवारी आवतजावत बढेकाले उपत्यकामा मानिसको आवागमनसमेत बढेको महानगरीय प्रहरी कार्यालय काठमाडौंले जनाएको छ ।
सवारी भित्रिनेक्रम बढेकाले मानिसको चहलपहलमा वृद्धि भएको प्रहरीले जनाएको छ ।
मानिसको भीड बढेसँगै कोरोना संक्रमण पनि जोखिम बढेको छ ।
उपत्यका नगरपालिका फोरमका सचिव मध्यपुर थिमी नगरपालिकाका प्रमुख मदनसुन्दर श्रेष्ठले अन्य जिल्ला र उपत्यकाको हकमा एउटै नियम लागू गर्दा कोरोनाको संक्रमण दर बढेको बताए ।
उनले भने, ‘हामी उपत्यकाको नाका खोल्न नहुने पक्षमै थियौँ, सरकारलाई सुझाव पनि दिएको हो, तर कार्यान्वयन नहुँदा भीडभाड र संक्रमण दर बढेको छ ।
उपत्यका र अन्य जिल्लामा एउटै नियम लागू गर्नुहुन्न भन्ने पक्षमा हामी छौँ ।’
महानगरीय ट्राफिक प्रहरी महाशाखाका अनुसार अहिले झण्डै २० हजार सवारीसाधान उपत्यका भित्रिने र सोही हाराहारीमा बाहिरिने गरेको छ ।
सोमबार उपत्यकामा चार हजार
५८३ सवारीमा १९ हजार ९०० यात्रु भित्रिएका थिए ।
चार हजार ६९८ सवारीमार्फत २० हजारभन्दा बढी यात्रु बाहिरिएका छन् ।
काठमाडौं उपत्यकामा जोरबिजोर प्रणालीअनुसार सवारी सञ्चालनमा छ । सार्वजनिक सवारी साधनले पनि आधामात्रै यात्रु राखेर हिँड्न पाउँछन् ।
सवारीले
५० प्रतिशत बढी भाडा लिन पाउने व्यवस्था गरिएको छ ।
आवश्यक स्वास्थ्य सुरक्षा मापदण्डअनुसार सवारी चलाउन भनिएको छ ।
तर, सबै सवारीले पूर्णरूपमा आदेश लागू गरेका छैनन् ।
प्रमुख श्रेष्ठले जोरबिजोर प्रणाली अहिले कागजमै सीमित भएको बताए ।
त्यसकारण पनि उपत्यकामा भीडभाड बढेको हो ।
महानगरीय ट्राफिक प्रहरी महाशाखाका
प्रमुख प्रहरी वरिष्ठ उपरीक्षक भीमप्रसाद ढकालका अनुसार केही खुकुलो हुँदा सवारी बढेको पाइएकाले हो ।
उनले मंगलबारदेखि जोरबिजोरको पूर्ण कार्यान्वयनमा प्रहरी परिचालन गरिएको बताए ।
मंगलबार मध्याह्नसम्म मात्रै उपत्यकामा एक हजार एक सय सवारीलाई कारवाही गरिएको उनको भनाइ छ ।
उनका अनुसार सामाजिक र भौतिक दूरी कायम नगर्ने सवारी साधानलाईसमेत कारवाही तीव्र पारिएको छ ।
तोकिएभन्दा बढी भाडा लिएको, बढी यात्रु राखेको तथा स्वास्थ्यमापदण्ड प्रयोग नगरेको पाइएमा पनि सवारीलाई कारवाही गरिने उनले बताए ।
स्वास्थ्य तथा जनसंख्या मन्त्रालयले दैनिकरूपमा सार्वजनिक गर्ने गरेको विवरणअनुसार देशभर कोरोना संक्रमित मानिसको झण्डै आधा उपत्यकाका व्यक्ति छन् ।
