नवलपरासी पश्चिम– नवलपरासी पश्चिम प्रहरी प्रमुख एसपी अजय केसीको अपरेसनले २ वटा पिकअप गाडी र १ मोटरसाइकलसहित अवैध मालसामान बरामद गरेको छ ।
जिल्लामा आएदेखि तस्करविरुद्ध कडा रूपमा प्रस्तुत हुँदै आएका एसपी केसीको सक्रियतामा मंगलबार अवैध सामान ओसार–पसारमा संलग्न २ वटा पिकअप गाडी र १ मोटरसाइकलसहित २२ लाख ७९ हजार ९ सय रूपैयाँ मूल्य बराबर अवैध मालसामान जिल्लाको बिभिन्न स्थानबाट बरामद गरेको हो ।
एसपी केसीले जिल्ला मातहत रहेका युनिट इन्चार्जहरूलाई समेत तस्करसँग लसपस पाए सिधै निलम्बन गर्ने चेतावानी दिँदै आएका छन् ।त्यसै क्रममा मंगलबार बा १५ च ७९८५ र लु २ च ९२७५ नम्बरको २ वटा पिकअप गाडीमा भारतबाट नेपालतर्फ भन्सार छली अवैध रूपमा मालसामान भित्र्याउँदै गरेको सूचना पाएपछि उनले ती गाडीहरूलाई प्रहरीले नियन्त्रणमा लिएका थिए । सीमा प्रहरी चौकी महेशपुरबाट खटिएको प्रहरी टोलीले पाल्हिनन्दन गाउँपालिका–२ हरपुरबाट १२० बोरामा ६ हजार केजी (प्रत्येक पिकअपमा ६० बोरा) प्याज बरामद गरेको छ ।
उक्त प्याजको अन्दाजी मूल्य ३ लाख बराबर र २ वटा गाडीको १६ लाख (प्रतिगाडी ८ लाख) गरी जम्मा १९ लाख बराबर मूल्य रहेको प्रहरीको अनुमान छ ।
दुवै गाडीका चालकसहित बरामद प्याज र २ वटै पिकअप गाडी मंगलबार नै आवश्यक कारबाहीका लागि महेशपुर भन्सार कार्यालय बुझाइएको प्रहरीले जनाएको छ ।
त्यसैगरी मंगलबार नै भारतबाट नेपालतर्फ अबैध रूपमा भन्सार छली मालसामान लु ५६ प ६८९४ नं. को मोटरसाइकलमा राखी ल्याउँदै गरेको थान कपडा २७० मिटर, साडी ५१ पिस, लेडिज ३० पिसलगायत कपडा इलाका प्रहरी कार्यालय अमानिगन्जबाट खटिएको प्रहरी टोलीले पाल्हिनन्दन गाउँपालिका–३ कुस्माबाट मोटरसाइकलसहित बरामद गरेको छ ।
उक्त बरामद सामानको अन्दाजी मूल्य ८७ हजार ९ सय र मोटरसाइकलको अन्दाजी मूल्य १ लाख गरी जम्मा १ लाख ८७ हजार ९ सय बराबर रहेको छ ।
उक्त सामान मोटरसाइकलमा राखी ल्याउँदै गर्दा प्रहरी टोलीलाई देखी मोटरसाइकल र सामान छाडी मानिस भागेका थिए । बरामद कपडा र मोटरसाइकल आवश्यक कारबाहीका लागि मंगलबार महेशपुर भन्सार कार्यालय बुझाइएको प्रहरीले जनाएको छ ।
त्यसैगरी मंगलबार नै नेपालबाट भारततर्फ अवैध रूपमा लैजाँदै गरेको अन्दाजी १ लाख ४० हजार मूल्य बराबरको ३५ बोरामा १ हजार ७ सय ५० केजी हरियो मटर (केराउ) सुस्ता गाउँपालिका–५ ठाडीघाटबाट इलाका प्रहरी कार्यालय बेलाटारी र प्रहरी चौकी रामनगरबाट खटिएको संयुक्त प्रहरी टोलीले बरामद गरेको प्रहरीले जनाएको छ ।
उक्त मटर साइकलमा राखी लैजाँदै गर्दा प्रहरी टोलीलाई देखी बोरा फाली साइकलसहित मानिस भागेका थिए ।
त्यस्तै, नेपालबाट अबैध रूपमा भारततर्फ लैजादै गरेको अन्दाजी ५२ हजार रूपैयाँ मूल्य बराबरको १७ बोरामा ६५० केजी सेतो मटर (केराउ) प्रतापपुर गाउँपालिका –५ बसहियाबाट प्रहरी चौकी बसहियाको प्रहरी टोलीले बरामद गरेको छ । बरामद मटर मंगलबार नै आवश्यक कारबाहीको लागि महेशपुर भन्सार कार्यालय बुझाइएको नेपाल प्रहरी नायब उपरीक्षक डिएसपी राजु लामाले बताए ।
