काठमाडौं– गैरआवासीय नेपाली संघ (एनआरएनए) ले शुक्रबारदेखि दोस्रो एनआरएनए विश्व ज्ञान सम्मेलन सुरु गर्ने भएको छ ।
बुधबार विज्ञप्ति जारी गर्दै प्रधानमन्त्री केपी ओलीले सम्मेलनको उद्घाटन गर्ने र तीनदिने सम्मेलनमा २५ भन्दा बढी देशका सयभन्दा बढी विश्वविद्यालय र अनुसन्धान केन्द्रबाट ३ सय प्रस्तोताहरूको सहभागी रहने एनआरएनएले जनाएको हो ।
एनआरएनएका अनुसार सम्मेलनको उद्देश्य विदेशमा रहेका नेपालीले आर्जन गरी सिकेका ज्ञान, सीप, प्रविधि एवं पुँजीलाई उपयोग गरेर नेपालको विकासमा प्रयोग गरिनेछ ।
२३ शुक्रबारदेखि २५ सम्म चल्ने उक्त सम्मेलनमा ४ वटा प्लेजरी र विविध विषयमा १५ वटा सिम्पोजियम सत्र कार्यक्रमको तय गरिएको एनआरएनएले जनाएको छ ।
सम्मेलनले विशेषगरी कोभिड–१९ ले पारेको प्रभाव र कोरोनाका कारण विश्वभर चालिएका कदम र नेपालले अवलम्बन गर्नुपर्ने रणनीतिका बारेमा बहन गरिने एनआरएनएले विज्ञप्तिमार्फत भनेको छ ।
साथै, संयुक्त राष्ट्र संघको दीगो विकासको लक्ष्य र नेपाल सरकारको १५औँ पञ्च वर्षिय योजनामा विज्ञहरूले कार्यपत्र प्रस्तुत गरिने पनि एनआरएनऐ जनाएको छ ।
एनआरएनएका अनुसार सम्मेलनमा विज्ञ तथा विभिन्न व्यक्तिहरूबाट २ सय वटा कार्यपक्र प्रस्तुत गरिनेछ । सम्मेलनको पहिलो दिनका विभिन्न सत्रमा कृषि, र खाद्य सुरक्षा, प्रविधिमैत्री र स्टार्ट अप कम्पनी, भौतिक पूर्वाधार विकास, कोरोना महामारीको कहर र सार्वजनिक स्वास्थ्य, व्यवसायिक शिक्षा, अनुसन्धान, प्रविधि तथा बजारीकरणका बारेमा छलफल हुने एनआरएनएले जनाएको छ ।
सम्मेलनको दोस्रो दिन महामारी तथा प्राकृतिक प्रकोप संकट व्यवस्थापन, विज्ञान तथा प्रविधि नीति तथा नेपाली अर्थतन्त्रमा कोरोना प्रभाव र पुनरुत्थान विषयमा बहन कार्यक्रम रहेका एनआरएनएले जनाएको छ । साथै, नेपाललाई उपयुक्त हुने प्रविधिको सम्भावना र यस क्षेत्रमा लगानीलगायत विकास नीति निर्माणमा घनिभूत छलफल हुने एनआरएनएले जनाएको छ ।
सम्मेलनको तेस्रो दिन जीवन र स्वास्थ्य, ऊर्जा, आर्थिक रूपान्तरण, सूचना तथा सञ्चार प्रविधि, वातावरण तथा समाज विज्ञान लगायत सत्रहरूमा विज्ञहरूले कार्यपत्र प्रस्तुत गर्ने एनआरएनएले जनाएको छ । कार्यक्रमको समिक्षा, भविष्यको रणनीति र निष्कर्षबारे सरकार विभिन्न निकाय र विज्ञहरूबीच छलफल र परामर्श हुने पनि विज्ञप्तिमा उल्लेख छ ।
एनआरएनएको मुख्य आयोजना र नेपाल सरकारको सहआयोजना हुन लागेका उक्त तीन दिने सम्मेलनमा काठमाडौं विश्विद्यालयको सहकार्य रहेको छ ।
सम्मेलनमा सरकार पक्षबाट प्रधानमन्त्री, परराष्ट्रमन्त्री, शिक्षा तथा प्रविधि मन्त्रालय, राष्ट्रिय योजना आयोग, नेपाल विज्ञान तथा प्रविधि प्रज्ञा प्रतिष्ठान, त्रिभुवन विश्वविद्यालय, राष्ट्रिय अनुसन्धान केन्द्रलगायत निजी संघ संस्थाहरूको आबद्धता रहेको छ । सम्मेलनपश्चात् श्वेतपत्र जारी गर्ने पनि बताइएको छ ।
