काठमाडौं– बीचमा केहीसमय दर्शकमाझ गायब भएकी कलाकार रक्षा श्रेष्ठ एउटा सरप्राइज लिएर दर्शकसामु सार्वजनिक भएकी छन् । जन्मदिनको अवसरमा दर्शकका लागि सरप्राइज खबरसहित बुधबार सार्वजनिक भएकी हुन् । चर्चित टेलिसिरियल भद्रगोलमा ‘रक्षा’ पात्रमा अभिनय गरिरहेकी उनी लामो समय सिरियलमा देखिएकी थिइनन् । बुधबार जन्मदिन मनाउँदै गरेकी रक्षाले उनका प्रशंसकका लागि दुई महिनाकी छोरीसँगको तस्बिर सामाजिक सञ्जालमा सार्वजनिक गरेकी छन् ।
उनले छोरीको नाम राखेकी छन्, माहिरा गुरुङ । यो सरप्राइज आएलगत्तै उनलाई बधाइ दिनेको ओइरो लागेको छ । बधाइको दिनेको भीडमा उनीसँग अनस्क्रिन केमेस्ट्री मिल्ने ‘जिग्री ब्रो’ अर्थात कुमार कट्टेल समेत छन् ।
गत २३ वैशाखमा छोरीलाई जन्म दिएकी रक्षाले आफू आमा बनेको खबरलाई गोप्य राखेकी थिइन् । बुधबार आङ्खनो जन्मदिन पनि परेको र छोरी पनि दुई महिना पुगेकाले सार्वजनिक गरेको उनले जनाएकी छिन् । मिडियामा आफूबारेका भ्रामक खबर आउन थालेपछि सत्यतथ्यका लागि छोरीको नामसहित बाहिर ल्याएको उनले जनाएकी छन् । कोभिडको कारण उनले जन्मदिन घरपरिवारसँगै मनाएकी छन् । भद्रगोलसँगै रक्षाले अर्को सिरियल सक्किगो निमा अभिनय गरेकी छन् ।
गर्भवती भएपछि भने अभिनयबाट ब्रेक लिएकी उनले तत्काल कला अभिनयमा फर्कनेबारे नसोचेको बताएकी छन् । ‘अहिले पूरा समय छोरीलाई नै दिनुपर्छ । छोरी सानै भएकाले अभिनयमा फर्किन अझै केही समय लाग्ला,’ उनले भनिन् । अभिनयमा परिवारबाट साथ र समर्थन रहेकाले चाँडै दर्शकमाझ आउने उनको प्रतिवद्धता छ ।
