काठमाडौं– कोरोना भाइरसको संक्रमण कम भएसँगै नेपाली चलचित्र क्षेत्र विस्तारै लयमा फर्किन थालेको छ । कोरोना महामारीका कारण स्थगित गरिएका चलचित्रको सुटिङको काम धमाधम सुरु गर्ने तयारीमा निर्माता तथा निर्देशकहरू लागेका छन् । कोरोना महामारीको दोस्रो लहरका कारण छायांकन सुरु गर्न लागेका र बीचमै रोकिएका चलचित्रहरू पुनः फ्लोरमा जाने तयारीमा जुटेका हुन् । केहीले छायांकन सुरु हुने मिति सार्वजनिक गरिसकेका छन् भने केही पर्ख र हेरको अवस्थामा छन् । सानो पर्दाका चलचित्रहरू भने सुरु भइसकेका छन् ।
यस्तैमा अभिनेता अनमोल केसी पनि नयाँ चलचित्र गर्ने तयारीमा जुटेका छन् । हाल नेपाली फिल्म क्षेत्रमा सबभन्दा विकाउ अभिनेता अनमोल ‘एक्स ९’ को लागि रिजर्भ बसेका छन् । आफ्नै होम प्रोडक्सनको तीन वटा चलचित्रलाई पर सारेर उनी उक्त फिल्मका लागि तयारी अवस्थामा बसेका हुन् । यद्यपि ‘एक्स ९’ को तिहारपछि मात्र हुने अनुमान गरिएको छ ।
लामो समयदेखि निर्देशक मुकुन्द भट्टसँग उनको निरन्तर छलफल भइरहेको छ । ७५ लाख पारिश्रमिकसहित उनलाई फिल्म ‘एक्स ९’ अफर गरिएको थियो । उनी फिल्ममा काम गर्न सकारात्मक छन् । दुवै पक्ष साउनभित्र कागजी सम्झौता गर्ने तयारी रहेको स्रोतले बताएको छ ।
अनमोलले यो फिल्मको छायांकन पूरा गरेपछि मात्र घरको फिल्म ‘एन्टी हिरो’, ‘पारस’ र ‘माइतीघर–२’ लाई समय दिने बताइएको छ । तिहारपछि छायांकन सुरु हुने ‘एक्स ९’ का लागि उनले अहिलेदेखि नै शरीर सुगठित बनाउन कडा मिहिनेत गरिरहेको जानकारी प्राप्त भएको छ । फिल्ममा उनी एक्सन अवतारमा प्रस्तुत हुनेछन् । यसअघि फिल्म ‘कृ’ मा पनि उनी एक्सन भूमिकामा देखिएका थिए ।
फिल्ममा सौगात मल्ल, पुष्प खड्का, अनुपविक्रम शाही, प्रियंका थापा र राज कटुवाल पनि मुख्य भूमिका रहने निर्देशक भट्टले जनाएका छन् । नेपालसँगै युरोपका विभिन्न सहर र आबुधाबीमा फिल्मको सुटिङ हुनेछ । निर्माण टिमले फिल्मका लागि भिलेनको भूमिका बलिउड अभिनेता सुनील शेट्टीलाई अफर गरेको जानकारी दिएको छ । तर, उनीसँग कागजी सम्झौता भने भएको छैन ।
फिल्म ‘होस्टेल’ बाट नायकको रूपमा डेब्यू गरेका अनमोलले आफ्नो करिअरमा ‘जेरी, ड्रिम्स, गाजलु, ए मेरो हजुर ३’ जस्ता सुपरहिट फिल्म दिइसकेका छन् । फिल्म ‘कृ र क्याप्टेन’ भने अपेक्षाकृत चलेनन् । हरेक फिल्ममा अभिनयको आलोचना खेप्दै आएको भए पनि छोटो समयमा उनले जुन खालको लोकप्रियता र स्टारडम बनाएका छन्, त्यो साँच्चै लोभलाग्दो र उदाहरणीय छ ।
अनमोल फिल्म ‘ए मेरो हजुर ४’ को छायांकन सकेपछि घरमै सीमित छन् । दोस्रो चरणको कोरोना महामारी नफैलिएको भए उनले यतिबेलासम्म होम प्रोडक्सनको फिल्म ‘एन्टी हिरो, पारस र माइतीघर २’ मध्ये एक फिल्मको छायांकन भ्याइसकेका हुने थिए । त्यस्तै, ‘ए मेरो हजुर ४’ रिलिजको मुखमा हुन्थ्यो । तर, कोरोनाले गर्दा फिल्म निर्माणदेखि रिलिजसम्म प्रभावित भएको छ ।
