हलेसी महादेवस्थान– खोटाङ जिल्लाका विभिन्न स्थानहरूमा स्व.पर्शुराम राई प्रतिष्ठानले स्वास्थ्य सामग्रीहरू वितरण गरेको छ । कोरोना भाइरसको दोस्रो भेरियन्टले गाँजिरहेको अवस्थामा जिल्लाको ६ स्थानमा स्वास्थ्य सामग्रीहरू वितरण गरेको हो । स्व.पर्शुराम प्रतिष्ठानको नेतृवमा आइएमएस समूह र ग्रिन भिलेज हाउजिङ प्रा.लि.को सहयोगमा स्वास्थ्य सामग्रीहरू वितरण गरिएको प्रतिष्ठानका संरक्षक रबिन चाम्लिङ राईले बताएका छन् ।
साउन ३ गते प्रतिष्ठानले हलेसी तुवाचुङ नगरपालिका–७ महादेवस्थानमा कार्यक्रम गरेर पोलिक्लिनिकलाई १ हजार ५ सय माक्स, १ वटा अक्सिमिटर र स्यानिटाइजर, हलेसी प्रतिष्ठानलाई ४ हजार माक्स, ४ वटा अक्सिमिटर, खामाखा खार्चुङ समाजलाई १ हजार माक्स १ वटा अक्सिमिटर, हलेसी तथा दिक्तेल रूपाकोट मझुवागढी नगरपालिका–१४ बुइपालाई ८ हजार माक्स, १० लिटर स्यानिटाइजर, १० वटा अक्सिमिटर र ८ थान पिपिई सेट वितरण गरेको छ ।
यसैगरी, प्रतिष्ठानले नेपाल पत्रकार महासंघ खोटाङ शाखालाई ३ हजार माक्स, ५० थान फेससिल्ड, ३ वटा अक्सिमिटर र ११ वटा पकेट स्यानिटाइजर, ऐसेलुखर्क गाउँपालिका–३ ऐसेलुखर्कलाई २० हजार माक्स, २० लिटर स्यानिटाइजर, ९ वटा अक्सिमिटर १० थान पिपिई सेट, ३० वटा फेससिल्ड, ज्येष्ठ नागरिक संघ लफ्याङलाई १ हजार वितरण गरेको छ ।
प्रतिष्ठानका संयोजक जगदिश राजभण्डारी, कोषाध्यक्ष विजयकला राई, मनिला राई सदस्यहरू गुणराज राजभण्डारी, चन्द्रकुमारी राई, ईन्द्र राई, मानबहादुर राई, कुलदीप मिश्रलगायतको उपस्थितिमा प्रतिष्ठानाले स्वास्थ्य सामग्री वितरण गरेको थियो । अझै जिल्लाका विभिन्न वडाहरूमा ३७ हजार माक्स वितरण गर्ने लक्ष्य रहेको संरक्षक चाम्लिङले बताए ।
यसैबीच, खोटाङ हलेसीमा आई आफूहरूले गरेको भाकल पूरा भएकाले स्वास्थ्य सामग्री वितरणका लागि खोटाङ आइपुगेका प्रतिष्ठानका सदस्य जिल्ला काठमाडौं बुढानिलकण्ठ–९ बस्नेका कुलदीप मिश्रको परिवारले १ लाख १ हजार ५ रूपैयाँ र इलाम चुलाचुली वडा नं. १ का मानबहादुर राईले ५० हजार ५ रूपैयाँ हलेसी प्रतिष्ठानको संयोजकत्वमा हलेसी मन्दिर परिसरमा घन्टी राखी दिनका लागि रकम हस्तान्तरण गरेको हलेसी प्रतिष्ठानका उपाध्यक्ष खुबाचन्द्र राईले बताए ।
अभिनेत्री मनीषा कोइरालाको व्याप्स स्वामीनारायण संस्था युकेबाट प्राप्त १ वटा अक्सिजन कन्सन्ट्रेटरलगायत स्वास्थ्य सामग्री हलेसी तुवाचुङ नगरपालिकालाई हस्तान्तरण गरिएको छ । अभिनेत्री कोइरालाको संस्थाबाट प्राप्त तथा आइएमएस गु्रप, ग्रिन भिलेज हाउजिङ प्रालिको सहयोग स्व.पर्शुराम राई प्रतिष्ठानको पहलमा संयोजक जगदिश राजभण्डारीले नगरप्रमुख इवन राई र उपप्रमुख विमला राईलाई नगरपालिकामा स्वास्थ्य सामग्री हस्तान्तरण गरेका हुन् ।
अक्सिजन कन्सन्ट्रेटरसहित २० लिटर स्यानिटाइजर, १० हजार माक्स, १० थान पिपिई सेट, बच्चाका लागि एक कार्टुन सिटामोल झोल र दुई कार्टुन ग्लोब्स हस्तान्तरण गरिएको छ । आर्थिक वर्ष सकिएलगत्तै स्वास्थ्य सामग्रीहरू कम भइरहेको अवस्थामा स्वास्थ्य सामग्री पाउँदा खुसी लागेको नगर उपप्रमुख राईले बताइन् । अत्यावश्यक स्वास्थ्य सामग्रीले कोभिड–१९ महामारी रोकथाम गर्न थप सहयोग पुग्ने उनको भनाइ छ । महामारीको बेलामा स्वास्थ्य सामग्री सहयोग गरेकामा नगरप्रमुख राईले सम्बद्ध संस्थालाई धन्यवाद ज्ञापन गरेका थिए ।
