काठमाडौं– मुलुकभर कोरोना संक्रमितको संख्या घटेर बन्दाबन्दीलाई खुकुलो बनाइएपछि फेरि संक्रमितको संख्या बढ्नुको साथै मृत्युदर पनि बढेको छ । पछिल्लो २४ घन्टामा संक्रमितको संख्या बढेर तीन हजार १०८ पुगेको छ भने कोरोना भाइरसको संक्रमणबाट थप २५ संक्रमितको मृत्यु भएको छ । योसँगै कोरोना भाइरसको संक्रमणबाट ज्यान गुमाउनेको संख्या नौ हजार ६०७ पुगेको मन्त्रालयले जनाएको छ ।
सोमबार कोरोनाबाट ३२ जनाले ज्यान गुमाएका थिए भने आइतबार कोरोना भाइरसका कारण २३ जनाको मृत्यु भएको थियो । सोमबार संक्रमितको संख्या दुई हजार ४४५ थियो भने आइतबार सो संख्या एक हजार ८०१ रहेको थियो । योसँगै नेपालमा कोरोना भाइरसबाट संक्रमितको संख्या सात लाख २१ हजार दुई पुगेको छ ।
पछिल्लो २४ घन्टामा थप आठ हजार ८३६ को पिसिआर परीक्षण तथा चार हजार २९९ को एन्टिजेन परीक्षण गरिएको स्वास्थ्य तथा जनसंख्या मन्त्रालयले जनाएको छ । पिसिआर विधिबाट दुई हजार २०२ तथा एन्टिजेन विधिबाट परीक्षण गर्दा ९०६ मा संक्रमण पुष्टि भएको हो ।
सोमबार सात हजार ८३३ को पिसिआर परीक्षण गर्दा एक हजार ६४२ तथा तीन हजार ८३१ को एन्टिजेन विधिबाट कोरोना परीक्षण गर्दा ८०३ मा संक्रमण पुष्टि भएको थियो । यस्तै आइतबार छ हजार ६२८ को पिसिआर परीक्षण गर्दा एक हजार २२३ तथा तीन हजारको एन्टिजेन विधिबाट परीक्षण गर्दा ५७८ मा संक्रमण पुष्टि भएको थियो ।
काठमाडौं उपत्यकामा पछिल्लो समय ७१९ संक्रमित थपिएका छन् । काठमाडौंका ५३१, भक्तपुरका ४१ तथा ललितपुरका १४७ जना रहेका मन्त्रालयले जनाएको छ ।
झापामा कोरोना संक्रमितको संख्या दैनिक वृद्धि हुन थालेपछि बुद्धशान्ति गाउँपालिकाले मंगलबारदेखि एक हप्ताका लागि पालिका सिल गर्ने भएको छ । पालिकाले मंगलबार राति १२ बजेदेखि साउन १२ गते राति १२ बजेसम्मका लागि सबै वडा सिल गर्ने भएको हो । पालिकाका अध्यक्ष रमेश भुजेलले पालिकाभित्रका सम्पूर्ण पसल, व्यवसाय, सरकारी तथा गैरसरकारी कार्यालय र मानिसको आवत्जावतसमेत पूर्णरूपमा बन्द गरिने बताए । अत्यावश्यक सेवा भने सञ्चालन गरिने छ । त्यस्तै मेची राजमार्गमा आवत्जावत हुने सवारीसाधनलाई भने रोक नलगाइएको भएको छ । वडाहरूमा गरिने एन्टिजेन परीक्षणबाट दैनिक ३५ देखि ४० जनासम्ममा पोजेटिभ देखिएपछि बाध्य भएर पालिका बन्द गर्नुपरेको हो ।
प्रदेश २ मा भने कोरोनाका सक्रिय संक्रमितको संख्यामा कमी आएको छ । स्वास्थ्य निर्देशनालय प्रदेश २ का अनुसार हाल यस प्रदेशमा ४ सय ९५ जना मात्र कोरोनाको सक्रिय संक्रमित रहेका छन् । सक्रिय संक्रमितहरू मध्ये २७ जना विभिन्न अस्पतालमा उपचाररत रहेका छन् भने ४ सय ६८ जना होम आइसोलेसनमा रहेको स्वास्थ्य निर्देशनालय प्रदेश २ का निर्देशक विजय झाले जानकारी दिए ।
प्रदेशको ८ मध्ये ६ वटा जिल्लामा कोरोनाको सक्रिय संक्रमितको संख्या ५० भन्दा कम रहेको स्वास्थ्य निर्देशनालयले जनाएको छ । सर्लाहीमा अहिले सबैभन्दा कम ११ जना कोरोनाको सक्रिय संक्रमित रहेका छन् । त्यस्तै रौतहटमा १९, पर्सामा २५, सिरहामा ३६, सप्तरीमा ४५, बारामा ४९, धनुषामा ८२ र महोत्तरीमा २ सय २८ जना कोरोनाको सक्रिय संक्रमित रहेका छन् ।
प्रदेशमा हालसम्म ३७ हजार ५ सय ३६ जनामा कोरोना संक्रमण भएको छ । संक्रमितहरूमध्ये २७ हजार ९ सय ६९ जना पुरुष रहेका छन् भने ९ हजार ५ सय ६७ जना महिला रहेका छन् ।
