काठमाडौं– कमेडी र सस्पेन्स थ्रिलर जनरामा निर्माण भएको फिल्म ‘लभ सर्कल’ को पहिलो गीत सार्वजनिक भएको छ । ‘ओ मैयाँ’ बोलको सार्वजनिक गीतमा अंकित बाबु अधिकारी र विद्या तिवारीको संयुक्त आवाज रहेको छ । गीतमा गायक अधिकारीले नै संगीत भरेका छन् । गीतको भिडियोमा फिल्मका कलाकारहरू मुकुन भुषाल, पवित्रा आचार्य, नाजिर हुसेन र रिस्ता बस्नेत फिचर छन् ।
गीतमा मुकुन र पवित्रा, नाजिर र रिस्ताबीचको प्रेमभाव व्यक्त गरिएको छ । उनीहरूको एक–अर्कासँगको मित्रतालाई पनि गीतमार्फत देखाउन खोजिएको छ । कोरोनाका कारण सिनेमा हल बन्द भएकाले डिजिटल प्लेटफर्ममा रिलिज गर्न लागेको फिल्मको गएको हप्ता ट्रेलर सार्वजनिक भएको थियो । यो फिल्म २९ साउनमा डिस होमको च्यानल नम्बर ५५५ मा प्रदर्शनमा प्रदर्शन हुँदैछ ।
वसन्त निरौलाको निर्देशनमा तयार भएको फिल्ममा रविन्द्र झा, सुमन कोइराला (दले दाई) को पनि मुख्य भूमिका रहेको छ । मि टिभीको प्रस्तुतिमा ओम प्रकाश अग्रवाल र रोशन पौडेलको संयुक्त निर्माण रहेको फिल्ममा अंकितबाबु अधिकारीको संगीत, अभिमन्यु निरवीको लेखन, दिव्य सुवेदीको छायांकन, पवित्रा आचार्यको कोरियोग्राफी र साहिल खान÷मिलन श्रेष्ठको सम्पादन छ ।
