काठमाडौं– कोरोना महामारीको दोस्रो लहर केही कम भएपछि छायांकन सम्पन्न भएको नेपाली चलचित्र ‘लाइफ इन एलए’ को फस्र्टलुक पोष्टर सार्वजनिक गरिएको छ । नेपाल र अमेरिकामा छायांकन गरिएको फिल्म ‘लाइफ इन एलए’ को दुईवटा पोष्टर सार्वजनिक गरिएको हो । निर्माण टिमले शनिबार सार्वजनिक गरेको फिल्मको फस्र्टलुक पोस्टरमा नव–अभिनेता ब्यास बिस्सुलाई अभिनेत्री शिल्पा मास्केसँग रोमान्टिक अवतारमा देख्न सकिन्छ भने दोस्रो पोस्टरमा उनको अंगालोमा अभिनेत्री अकेशा विष्ट छिन् ।
फिल्म त्रिकोणात्मक प्रेमकथामा आधारित रहेको पोस्टरले संकेत गरेको छ । निर्माण टिमले आगामी सोमबार फिल्ममा समावेश पहिलो गीत ‘पागल प्रेमी’ सार्वजनिक गर्ने तयारी गरेको छ । हाल पोस्ट प्रोडक्सनको काम भइरहेको फिल्मको ७५ प्रतिशत अमेरिका र २५ प्रतिशत नेपालमा छायांकन गरिएको थियो । अमेरिकामा बस्ने नेपालीको सफलताको कथा भन्ने फिल्मलाई सूर्य एन श्रेष्ठले निर्देशन गरेका हुन् ।
फिल्ममा गौरव पहारी, वुद्धि तामाङ, प्रकाश घिमिरे, लोकेन्द्र लेखकका साथै अमेरिकामा बसोबास गर्ने जारेड बिलप्स, साम भुजेल, जयन्द्र चिलुवाललगायतको पनि अभिनय छ । ब्यास इन्टरटेनमेन्टको प्रस्तुति रहेको फिल्मलाई ब्यास बिस्सुले निर्माण गरेका हुन् । संसार अन्जान सुवेदी कार्यकारी निर्माता रहेको फिल्ममा अमेरिकाको लागि राजेन्द्र ठकुराथी निर्माताको रूपमा छन् । भुपेन्द्र अधिकारी र उज्ज्वल ढकालको सम्पादन रहेको फिल्ममा कविराज गहतराज र सुरज श्रेष्ठको करियोग्राफी, एलिस कार्कीको संगीत छ । त्यस्तै, फिल्मको एसोसिएट निर्देशक दीपक ओली हुन् । उनले ‘पण्डित बाजेको लौरी’, ‘कृष्ण लीला’लगायतका फिल्म निर्देशन गरिसकेका छन् ।
सरकारले सिनेमा हल खोल्न अनुमति दिएको खण्डमा आउँदो दशैंमा फिल्म प्रदर्शन ल्याउने निर्माण टिमको तयारी छ । यसैबीच आउँदो हप्ताबाट दुई फिल्म ‘रीत’ र ‘अञ्जली’ को पनि छायांकन सुरु हुने भएको छ । फाल्गुनन्द लिङ्देन फिल्मस्ले निर्माण गर्न लागेको ‘रीत’ लिम्बु संस्कृतिमा बन्न लागेको हो भने ‘अञ्जली’ हत्या हिँसा र अपहरणको कथा अर्थात् एक्सन जनरामा हुनेछ । दुवै फिल्मलाई दिनेश लिङ्देनले निर्देशन गर्नेछन् । ‘रीत’ लाई पूर्वका विभिन्न स्थानमा खिचिनेछ भने ‘अञ्जली’ को उपत्यका आसपासमा सुटिङ हुनेछ ।
दुवै फिल्ममा एलिना बाँस्कोटा, विमला खजुम, पूर्वराज्यमन्त्री श्रीप्रसाद जबेगु, स्मृति लिम्बु, असली बनेम, सागर केरुङ, पुन्य ओझा, हाङ चेम्जोङ, दिनेश माङमु, शर्मिला शर्मा, विशाल सेनीहाङ, नन्दु तुम्बापो, नरेश बनेम, निसाम तुम्बापो, प्रज्वलिका गिरी, भीम थेबे लिम्बु, अजय खडका, कल्याण राई, दीपक नेपाली, माइकल तुम्बापोलगायतका कलाकारहरूको अभिनय रहनेछ । मिकहाङ लिङ्देन र सुदिता लिदेनको प्रस्तुति रहेको ‘रीत’ र ‘अञ्जली’ को निर्मातामा कविता राई लिङ्देन, सागर केरुङ, धनराज खड्का, मनि ताम्लिङ, विक्रम पयांगु, दीपक नेपाली छन् । दुवै फिल्मको कथा सागर केरुङले लेखेका हुन् ।
