काठमाडौं– नेपाली सैनिक वार कलेज नगरकोटमा तालिमरत सेनाका अधिकृतबाट सि.सं. ३ का ५० जना अधिकृतहरूबाट प्रहरी प्रधान कार्यालयको बुधबार अवलोकन भ्रमण सम्पन्न भएको छ ।
सो क्रममा उनीहरूले प्रहरी प्रधान कार्यालयस्थित कमान्ड सेन्टर, केन्द्रीय पोलिग्राफ शाखा, डाटा सेन्टर, केन्द्रीय फरेन्सिक ल्याब, केन्द्रीय हेल्थ डेक्स र संग्राहलयसमेतको अवलोकन गरेका थिए ।
अवलोकनपश्चात आयोजित कार्यक्रममा प्रहरी महानिरीक्षक शैलेश थापा क्षत्रीले भ्रमणको क्रममा तालिमरत अधिकृतहरूले नेपाल प्रहरी संगठनको इतिहास एवं कार्य प्रकृतिसम्बन्धी यथेष्ट जानकारी हासिल गरेको विश्वास व्यक्त गरे ।
नेपाल प्रहरी सम्बन्धी विविध विषयमा तालिमरत अधिकृतहरूले राखेका जिज्ञासाहरूको निरूपण गर्दै प्रहरी महानिरीक्षक थापा क्षत्रीले शान्ति सुरक्षा एवं विपद् व्यवस्थापनमा सबै सुरक्षा निकायबीच आपसी सहयोग र समन्वय भइरहेको बताए । आउँदा दिनहरूमा समेत सकारात्मक कार्यहरू सम्पन्न गर्न आपसी सहयोग र समन्वय आदान प्रदान हुने उनले उल्लेख गरे । प्रहरी उपरीक्षक सविन प्रधानले नेपाल प्रहरीको काम, कर्तव्य र वर्तमान अवस्थाबारे प्रस्तुतीकरण गरेको उक्त कार्यक्रममा सेनानी राहुल अधिकारीले भ्रमणमा सहभागी तालिमरत अधिकृतहरूको तर्फबाट मन्तव्य व्यक्त गरेका थिए ।
