काठमाडौं– कोरोना महामारीका कारण चलचित्र क्षेत्र प्रभावित भइरहेको बेला नायक, निर्माता तथा निर्देशक जयकिशन बस्नेतले चलचित्र प्रदर्शन गर्ने जोखिम उठाउने तयारी गरेका छन् । सरकारले हल खोल्न दिने निर्णय गरे पनि हलले सिनेमा चलाउने आँट नगरेको र चलचित्र निर्माताहरूले समेत आफ्नो चलचित्र हलसम्म लान अन्कनाउने अवस्था रहेका बेला बस्नेतले भने आफूद्वारा निर्मित पछिल्लो चलचित्र ‘धुम–४’ प्रदर्शन गर्ने घोषणा गरेका छन् ।
बस्नेतको चलचित्र ‘धुम–४’ लक्ष्मीपूजाको अवसर पारेर १८ कात्तिकदेखि देशभरका हलहरूमा एकसाथ प्रदर्शन गर्ने तयारी गरेका छन् । सामाजिक र राजनीतिक घटनाक्रमलाई समेटेर सस्पेन्स, थ्रीलर, एक्सन तथा हाँस्य विषयसमेत समेटेर निर्माण गरिएको ‘धुम–४’ मा जय किशनको जोडीको रूपमा चारजना अभिनेत्री देखिएका छन् । चलचित्रमा उनले चार नायिकासँग धूम मच्चाएका हुन् । ‘धुम–४’को पहिलो गीत सार्वजनिक गरिएको छ ।
अन्य गीत र ट्रेलर समेत चाँडै सार्वजनिक गर्ने बताएका जयकिशनले ‘धुम–४’ को एउटा गीत मात्र सार्वजनिक गरेका हुन् । ‘पख है काली’ बोलको उक्त गीतमा जय किशनका साथमा सञ्जोग राणा, जाहान्वी बस्नेत, अनुश्रुत खड्का, बन्दना नेपाल, रोशन श्रेष्ठ, एलिसा खड्का, एनी विस्ट, एलिशा सुनार, दिप्ती लामिछानेलगायतका कलाकारहरूलाई देख्न सकिन्छ । उक्त गीतमा मेलिना राई र राकेश राईको स्वर सुन्न सकिन्छ । सुजन कटुवालले लेखेको गीतको संगीत याम गुरुङले गरेका हुन् । गीतको भिडियोमा प्रज्वल रावलको छायांकन, कमल राईको नृत्य तथा सुवास देवकोटाको सम्पादन रहेको छ ।
जय किशन बस्नेत फिल्मस् प्रा.लि.को व्यानरमा जाहान्वी बस्नेत र ब्रबिम बस्नेत प्रस्तुतकर्ता रहेको ‘धुम ४’ का निर्माता रविकुमार महर्जन हुन् । चलचित्रमा अलावा उरुषा पाण्डे, शोभित बस्नेत, एन. बि. महर्जन, विशाल गुप्ता, चन्दन अर्गेजा, केशव शाही, मदन ताम्राकार, शंकर महर्जन, देव महर्जन, विकाश पूजारी, शुशिला चौलागाई, प्रेमिका शर्मा लगायत कलाकारहरूको समेत अभिनय रहेको छ ।
चलचित्रको लेखन तथा निर्देशन जय किशन बस्नेत आफैँले गरेका हुन् । महामारी छ भन्दैमा निर्माण सकिएको चलचित्र पुरानो बनाएर थन्क्याउनुभन्दा जोखिम लिएरै भए पनि प्रदर्शन गर्न लागेको उनको भनाइ छ । स्वदेश तथा विदेशमा रहेका दर्शकहरूको अत्याधिक माग भएकोले पनि तिहारको अवसरमा चलचित्र चलाउन लागेको बस्नेतले बताए । चलचित्र दर्शकहरूकै मनोरञ्जनको लागि निर्माण गरिने भएकोले उनीहरूले माग गरेको बेला चलचित्र दिनु पर्ने कर्तव्यवोध गरेर नै आफूले जोखिम लिएको जयकिशनले बताए ।
