काठमाडौं– नेपाली चलचित्र ‘ग्रिन बर्ड’ को छायांकन सकिएको छ । अन्य चलचित्र सरदर ३० देखि ३५ दिनमा सकिने गरेको भए पनि सुरक्षा पन्त अभिनित ‘ग्रिन बर्ड’ १९ दिन मै ‘प्याकअप’ भएको हो । २५ दिनको ‘सेड्युल’ बनाएर छायांकनमा निस्किएको चलचित्रको गत मंगलबार अन्तिम दृश्य खिचिएको निर्माण टिमले जानकारी दिएको छ । चलचित्रको सम्पूर्ण दृश्य चितवन र नवलपुरमा छायांकन गरिएको निर्देशक प्रमोद कँडेलले जानकारी दिएका छन् ।
चलचित्रमा अभिनेत्री सुरक्षा पन्त मुख्य भूमिकामा छिन् भने कमलमणी नेपाल र अफरान अलीलगायतको पनि अभिनय रहेको छ । योङ स्टार सिनेमाको ब्यानरमा निर्माण भएको चलचित्रले परिवार र समाजको मूल्य मान्यताविरुद्ध गएर आफ्नो जीवन जिउन चाहने एक युवतीको संघर्षको कथा वाचन गर्ने बताइएको छ । यो चलचित्रको कथा र स्क्रिनप्ले निर्देशक कँडेल आफैँले तयार पारेका हुन् । कात्तिक स्मित कर्नाटकले खिचेको चलचित्रलाई अन्जय खड्काले सम्पादन गर्नेछन् । चलचित्र यसै वर्ष प्रदर्शन गर्ने तयारी गरिएको निर्देशक कँडेलले जानकारी दिए ।
‘रुदाने’ को टिजर सार्वजनिक
चार वर्ष अगाडि नै निर्माण भएको ‘थाहा’ आन्दोलका प्रणेता रूपचन्द्र विष्ट ‘रुदाने’ को जीवनीमा आधारित चलिचित्र ‘रुदानेः विद्रोहको नेपाली नाम’ को टिजर सार्वजनिक भएको छ । २ मिनेट ३३ सेकेण्ड लामो टिजरमा विष्टको चरित्र–चित्रण गरिएको छ । टिजरमा संवाद राखिएको छैन । चलचित्रमा दिव्य देवले रूपचन्द्रको भूमिका निभाएका छन् ।
अमित किशोर सुवेदी र विकास ढकालको लेखन तथा निर्देशन रहेको चलचित्रमा नम्रता श्रेष्ठ, रवि गिरी, सुभाष गजुरेल, अमर सुवेदीलगायतका कलाकारहरूको पनि अभिनय छ । चलचित्रमा जागृत रायमाझी कार्यकारी निर्माता र भानुभक्त थापा सह–निर्माता छन् । शान्ता राओको छायांकन, निमेश श्रेष्ठको सम्पादन र जेसन कुँवरको संगीत रहेको चलचित्रको प्रदर्शन मिति घोषणा गरिएको छैन ।
बाबु पदमबहादुर विष्ट र आमा चित्रकुमारीको कोखबाट २६ पुस १९९० मा मकवानपुरमा जन्मिएका उनी चेतना फैलाउने जनवादी नेता थिए । उनले ३० सालतिर ‘थाहा’ आन्दोलन सुरू गरेका थिए । उनी चट्टान, भित्ता, पर्खाल, रूखदेखि खाली कागज र चुरोटको बट्टासम्म ‘थाहा’ लेख्दै हिँड्थे । उनी ०२८ सालमा स्नातक कोटामा राष्ट्रिय पञ्चायत सदस्य समेत भएका थिए । तीन दशक ‘थाहा’ आन्दोलनको नेतृत्व गरेका उनको ७ असार ०५६ मा निधन भएको थियो ।
