नवराज पहाडी
बेसीशहर– लमजुङमा तीन दर्जन व्यक्तित्वलाई एउटै मञ्चबाट सम्मानको तयारी गरिएको छ । जिल्लाको जेठो पत्रिका अन्तरङ्गले आफ्नो २७औँ वार्षिकोत्सवका अवसरमा त्यस्तो सम्मान गर्न लागेको हो ।
चौथो राष्ट्रव्यापी मुक्तक प्रतियोगितको पुरस्कार वितरण सहित हुने उक्त कार्यक्रम बेसीशहरमा भदौ २३ गतेका लागि तयारी अन्तिम चरणमा पुगेको छ । राष्ट्रियस्तरका कार्यक्रम बिरलै हुने लमजुङमा अन्तरङ्गका सम्पादक नवराज पहाडीको नेतृत्वमा निरन्तर राष्ट्रव्यापी मुक्तक प्रतियोगिता हुँदै आएको छ ।
सो प्रतियोगिता पहिलो पटक २०५६ सालमा आयोजना गरिएको पहाडीले बताउनु भयो । उहाँका अनुसार दोस्रो मुक्तक प्रतियोगिताको पुरस्कार वितरण समारोह देखि मुक्तकका स्थापित सष्टाहरूलाई सम्मान गर्न थालिएको छ । त्यस वर्ष पाँच विकास क्षेत्रस्तरका १/१ जना मुक्तककारलाई सम्मान गरिएको थियो । त्यस्तो सम्मान पाउनेमा पश्चिमाञ्चलबाट शान्तिनारायण श्रेष्ठ पर्वत हुनुहुन्छ । भने मध्यपश्चिमाञ्चलबाट खगेन्द्र गिरी कोपिला सम्मानित हुनुभएको हो । उहाँहरू पनि यो वर्षको कार्यक्रममा सहभागी हुन आउँदै हुनुहुन्छ । तेस्रो प्रतियोगितका अवसरमा वरिष्ठ कलाकर्मी एवम् मुक्तककार चेतन कार्कीलाई सम्मान गरिएको थियो । यो वर्ष वरिष्ठ मुक्तककार द्विव्य गिरी, लोकेन्द्र डहरे, सिन्धुली र गौरी तमु, पोखरालाई सम्मान गर्ने निर्णय भएको उक्त कार्यक्रमका संयोजक एवम् अन्तरङ्गका संपादक नवराज पहाडीले बताउनु भएको छ ।
मुक्तक उत्सवका साथमा आयोजना गरिएको उक्त कार्यक्रममा असफल गौतमले कार्यपत्र प्रस्तुत गर्दै हुनुहुन्छ । त्यस्तै, सो अवसरमा प्रतियोगितामा प्राप्त भएका मुक्तकहरूको संग्रह अनुपम– २ स्मारिकाको विमोचन गर्ने तयारी छ । उक्त अवसरमा अन्तरङ्गसँग नजिक रहेर साहित्य कला संस्कृतिका क्षेत्रमा सहकार्य गर्नु हुने महानुभावहरू पनि सम्मानित हुने हुनुभएको छ । त्यस्तो सम्मान प्राप्त गर्नेमा त्रिविको अंग्रेजी विभागका प्राध्यापक केशव सिग्देल र पल्लव साहित्य प्रतिष्ठान चितवनका अध्यक्ष गोर्खे साइँलो हुनुहुन्छ ।
सिग्देलले २०७२ सालको भूकम्प गएको बेलामा लमजुङका भूकम्प पीडित तीन जना साहित्यकारलाई अन्तरङ्गको सिफारिसमा ३०/३० हजार रुपैयाँ राहत रकम प्रदान गर्ने कार्य गर्नु भएको थियो । त्यस्तै गोर्खे साइँलोले अन्तरङ्गको २३औँ वार्षिकोत्सवमा सहभागबी हुनुभएर अन्तरङ्गका गतिविधिलाई नजिकबाट नियाल्दै साहित्य सेवामा लाग्नका लागि थप उत्प्रेरणा थप्ने काम गर्नु भएको र त्यसपछिका दिनमा पनि निरन्तर सम्पर्कमा रहनु भई उर्जा प्रदान गर्नु भएको पहाडीले बताउनु भयो ।
यो वर्ष सम्मानित हुनुहुने विशिष्ठ व्यक्तित्वहरूमा लमजुङको पहिचानको रूपमा रहेको ठाडोभाकाका ज्यूँदा धरोहर बुद्धिमान दुरा जो अन्तरङ्गका सम्पादक नवराज पहाडी अध्यक्ष रहेको ठाडोभाका लोककला प्रतिष्ठान नेपालका संरक्षक समेत हुनुहुन्छ– उहाँका साथमा उहाँका गाउन जोडी सीता दुरालाई पनि सम्मान गरिने भएको पहाडीले जानकारी दिनु भयो ।
उहाँका अनुसार लमजुङको लोक संस्कृतिलाई माया गरेर चार वर्षसम्म जिल्लाका विभिन्न कुना कन्दरा चहारेर त्यसको खोज अनुसन्धान गरी दुई वटा नाटक फड्के र पानीघट्टको लेखन तथा निर्देशन र सफल मञ्चन समेत गर्नु हुने कलाकर्मी, नाट्य र साहित्यकार पुरु लम्साललाई पनि सम्मान गर्ने कार्यक्रम छ । पहाडीका अनुसार जिल्लामा रहेर कला, साहित्य, संस्कृतिको संरक्षण र प्रवद्र्धनका क्षेत्रमा काम गर्ने संस्थाका अध्यक्षलाई पनि पुरस्कृत गर्ने गरिएको छ । तेस्रो प्रतियोगिताका अवसरमा चिति साहित्य समाजका तत्कालीन अध्यक्ष रुद्रनिधि तिवारीलाई सम्मान गरिएको थियो ।
यो वर्ष जिल्लामा स्थापित साहित्यिक संस्थाहरूमा छोटो अवधिमै साहित्यकारहरूको सम्मान एवम् प्रोत्साहनका लागि पुरस्कारको स्थापना गरी त्यसको निरन्तरताका लागि ५० हजार रुपैयाँको अक्षयकोष खडा गरिसकेको बेसीशहर नगरपालिका– ६ मकैडाँड स्थित मकैडाँडा सारिङ साहित्य समाजका अध्यक्ष ईन्द्रबहादुर सुयललाई सम्मान गरिने भएको छ । यसैगरी, सम्मानित हुनेहरूमा स्थानीय तहमा प्रमुख भएर अन्तरङ्ग र यसका सम्पादक नवराज पहाडी आवद्ध संस्थाका गतिविधिलाई सहयोग गर्नु हुने स्थानीय तहका जनप्रतिनिधिहरूलाई पनि सो अवसरमा सम्मान गर्ने कार्यक्रम छ । जिल्ला स्थित चारवटै नगरपालिकाका मेयरहरू क्रमशः गुमानसिंह अर्याल, रमेश पाण्डे, सिंहबहादुर थापा र जनक मिश्रलाई सम्मान गरिँदैछ भने गाउँपालिका तर्फबाट मस्र्याङ्दी गाउँपाकिलाका अध्यक्ष अर्जुन गुरुङलाई सम्मान गरिने तय भएको पहाडी बताउनु हुन्छ ।
तेस्रो राष्ट्रव्यापी मुक्तक प्रतियोगिताका अवसरमा समाजसेवी सर्वोदय सेवाश्रमका अध्यक्ष कृष्णराज ओलियालाई सम्मान गरिएको थियो । यो वर्ष समावसेवीहरू सानुमाया गुरुङ, डिकेन्द्रराज कँडेल, रामबाबु श्रेष्ठ, राजेन्द्र बोहरा, महेन्द्रराज वाग्ले र कामसार्की गुरुङलाई सम्मान गरिने भएको पहाडीले बताउनु भएको छ । उहाँका अनुसार उक्त अवसरमा एकल महिला भएर पनि प्रभावकारी ढंगले व्यावसाय सञ्चालन गर्दै आउनु भएकी श्रेष्ठ रेडियो एण्ड वाच सेन्टरकी प्रोपाइटर एवम् लमजुङ उद्योग वाणिज्य संघकी सञ्चालक सदस्य पार्वती श्रेष्ठलाई सम्मान गर्ने कार्यक्रम रहेको पहाडी बताउनुहुन्छ । उहाँले लमजुङ रत्न साप्ताहिकलाई स्थापनाकालदेखि नै आफ्नो पसलको विज्ञापन दिएर सहयोग गर्नु भएको छ । त्यस्तै, नमूना विद्यालय सञ्चालन गर्ने महिला प्रधानाध्यापक नानुमाया पराजुलीलाई सम्मान गर्ने कार्यक्रम छ ।यसैगरी, अन्तरङ्गले राष्ट्रव्यापी मुक्तक प्रतियोगिताको स्थायित्वका लागि सुरु गरेको अक्षयकोष९कम्तिमा ७ लाख पुर्याउन कम्तिमा १५ हजार नगद सहयोग गर्नु हुने दाताहरू पनि सम्मानित हुँदै हुनुहुन्छ ।
त्यस्ता दाताहरूमा मस्र्याङ्दी बहुमुखी क्याम्पसका प्रमुख हरिबाबु थापा, वरिष्ठ समाजसे्जी नरेन्द्र ढुंगाना सुन्दरबजार, काठमाडौँ सामाखुसी निवासी समाजसेवी कृष्णबहादुर श्रेष्ठ साहु र कप्तान लिलबहादुर गुरुङ, बेसीशहर– ८ सेराफाँट हुनुहुन्छ । गत वर्ष यस्तो सम्मानबाट निवर्तमान सांसद जमिन्द्रमान घलेसहित चार जना सम्मानित भैसक्नु भएको छ । त्यसैगरी, सम्मानित हुनुहुने अन्य व्यक्तित्वमा अन्तरङ्ग र लमजुङ्ग रत्न साप्ताहिकका स्तम्भकार तथा विचारका लेखकहरू सर्वश्री दामोदर अधिकारी, कोषनिधि तिवारी, तीर्थराज पराजुली सम्मानित हुने हुनेभएको छ । यसअघि अर्थात तेस्रो राष्ट्रव्यापी प्रतियोगिताका अवसरमा अन्तरङ्गको खोजखबर स्तम्भका लेखक बौद्धिक व्यक्तित्व बुद्धिसागर बराल र साहित्यिक चटनीका स्तम्भकार विश्वविनोद सम्मानित भइसक्नु भएको छ ।
त्यस्तै, अन्तरङ्गका उत्कृष्ठ सहकर्मीहरू सहसम्पादक चन्द्रकान्त पौडेल, ब्युरो प्रमुख विष्णुकुमार श्रेष्ठ, प्राविधिक सहजकर्ता एवम् ठाडोभाका लोककला प्रतिष्ठान नेपालका सदस्य सञ्जोग लामिछाने र संवाददाताद्वय बेलबहादुर थापा र अधीर अधिकारी यसपटक सम्मानित हुँदै हुनुहुन्छ । उक्त कार्यक्रमको प्रमुख अतिथिमा सांसद धनञ्जय दवाडी र विशेष अतिथिमा त्रय संविधान सभाका सदस्य एवम् पूर्वसांसद जमिन्द्रमान घले, बेसीशहर नगरपालिकाका प्रमुख गुमानसिंह अर्याल र स्वतन्त्र पत्रकार संघ नेपालका राष्ट्रिय अध्यक्ष आमन्त्रित हुनु भएको पहाडीले जानकारी दिनु भयो । लमजुङ रत्न साप्ताहिक सहआयोजक रहेको उक्त कार्यक्रमका साथमा लमजुङ रत्नको चौथो वार्षिकोत्सव पनि मनाइने भएको छ ।
