काठमाडौं– कोरोना महामारीका कारण गत वैशाख पहिलो सातादेखि बन्द भएका हलहरू गत २१ असोजदेखि सञ्चालनमा आए । तर, हल सञ्चालन भएको एक महिनासम्म हलमा दर्शकहरू आएनन् ।
दशैँको अवसर पारेर शोभित बस्नेत निर्देशित मल्टि स्टारर फिल्म ‘डाडाँको वरपीपल’ प्रदर्शन गरिए । तर, उक्त फिल्मले दर्शकलाई हलसम्म तान्न सकेन । उक्त फिल्मले दर्शकलाई हलसम्म तान्न नसकेपछि नेपाली फिल्मका निर्माता तथा निर्देशकहरू फिल्म रिजिल गर्न हच्किएका थिए । चलचित्र विकास बोर्डले हल खुलेदेखि तीन महिनाको अवधिभित्र प्रदर्शनमा आउने फिल्मलाई राहत दिने घोषणा गर्दा पनि निर्माता तथा निर्देशकहरू तयार भएका थिएनन् ।
तर, तिहारको अवधिमा प्रदर्शनमा आएको बलिउड फिल्म ‘सूर्यवंशी’ ले आक्रामक व्यापार गरेपछि नेपालका निर्माता तथा निर्देशकहरू तात्न थालेका छन् । ठूला ब्यानरहरू अब आङ्खनो फिल्मको प्रदर्शन मिति घोषणा गर्ने तयारीमा जुटेका छन् । यसबीच, अभिनेत्री स्वस्तिमा खड्का अभिनित फिल्म ‘चपली हाइट ३’ ले प्रदर्शन मिति घोषणा गरेको हो । उक्त फिल्म आगामी २ पुसदेखि प्रदर्शन हुने भएको छ ।
सलमान खान अभिनित फिल्म ‘अन्तिम’ लाई दुई हप्ता छाडेर ‘चपली हाइट ३’ प्रदर्शनमा आउन लागेको हो । अहिले हलहरूमा फिल्मको पुरानो टिजर बजाउन सुरु गरिएको छ । आउँदो हप्ता फिल्मको नयाँ ट्रेलर सार्वजनिक गरिने निर्माता अर्जुन कुमारले बताएका छन् । यसअघि २८ चैत ०७७ लाई प्रदर्शन मिति घोषणा गरिएको थियो । तर, कोरोनाका कारण रिलिज रोकियो ।
अर्जुन कुमार फिल्मस्को ब्यानरमा निर्माण भएको यस फिल्ममा स्वस्तिमाका अलावा अर्पण थापा, सुपुष्पा भट्ट, महेश त्रिपाठी, प्रतिकमान श्रेष्ठ, दीपाश्री निरौला, लक्ष्मी बर्देवा, जीवन भट्टराई, लोकेन्द्र लेखक, विशाल पहारीलगायतको अभिनय छ । आकाश बरालको पटकथा÷संवाद रहेको फिल्ममा सुभाष भुषाल र अर्जुन कुमारको संगीत छ । फिल्मका निर्देशक निकेश खड्का हुन् ।
‘सूर्यवंशी’ ले हलमा दर्शक फर्काएपछि नेपाली निर्माताहरू फिल्म रिलिजका लागि मिति खोज्न जुटेका छन् । तर, आउँदो एक वर्षसम्म नेपाली फिल्मलाई राम्रो मिति भेट्न गाह्रो छ । किनकी, बलिउडका ठूला फिल्महरूले इद, भ्यालेन्टाइन, अंग्रेजी नयाँ वर्ष, शिवरात्रीलगायतका मिति ‘बुक’ गरिसकेका छन् । अब नेपाली फिल्मले बलिउड फिल्मलाई छलेर रिलिज डेट घोषणा गर्नुपर्नेछ ।
