काठमाडौं– कोरोना महामारीका कारण सुस्ताएको हलमा दर्शकहरू आउन थालेपछि नेपाली फिल्ममा निर्माता तथा निर्देशकहरूले धमाधम फिल्म रिलिजको मिति घोषणा गर्न थालेका छन् । गत वैशाखबाट बन्द भएको हल २१ असोजदेखि खुले पनि दर्शकहरू हलसम्म नआउँदा फिल्म रिलिज गर्न अन्कानाइ रहेका निर्माता निर्देशकहरू पछिल्लो समय फिल्मको प्रदर्शन मिति घोषणा गर्न तयार भएका हुन् ।
दसैँको अवसर पारेर शोभित बस्नेत निर्देशित चलचित्र ‘डाँडाको वरपीपल’ प्रदर्शन गरिएको थियो । उक्त फिल्मले दर्शकलाई हलसम्म तान्न सकेन । उक्त फिल्मको प्रदर्शनपछि नयाँ चलचित्र प्रदर्शन गर्न अझ हच्किएका निर्माता तथा निर्देशकहरू तिहारको अवसरमा रिलिज गरिएको हिन्दी फिल्म ‘सूर्यवंशी’को आक्रमक व्यापारपछि हौसिएका छन् । ‘सूर्यवंशी’ ले हलमा दर्शक फर्काएपछि नेपाली निर्माताहरूबीच आफ्नो फिल्मको प्रदर्शन मिति घोषणा गर्न हानाथाप नै सुरु भएको छ । यसैक्रममा कोरोनाका कारण रिलिज हुन नपाएको अभिनेता पल शाह र अभिनेत्री पूजा शर्मा अभिनित फिल्म ‘म यस्तो गीत गाउँछु २’ ले आउँदो १९ माघ (सोनाम ल्छोहार) लाई प्रदर्शन मिति घोषणा गरेको छ ।
फिल्मको प्रदर्शन मिति घोषणा गर्दै निर्देशक सुदर्शन थापाले फेसबुकमा लेखेका छन्, ‘कुनै एक फिल्ममा मात्र नभई पूरै नेपाली फिल्म क्षेत्र नै चलायमान हुनु अहिलेको आवश्यकता हो । सोही उद्देश्यका साथ नेपाली फिल्म ‘म यस्तो गीत गाउँछु २’ यहि वर्षको माघ १९ प्रदर्शन गर्ने निर्णय गरेको छौँ ।’ यसअघि ३० फागुन ०७६ लाई फिल्मको प्रदर्शन मिति घोषणा गरिएको थियो । तर, कोरोना महामारीका कारण उक्त फिल्मको प्रदर्शन सारिएको थियो ।
फिल्ममा पल र पूजाका अलावा हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारहरूको अभिनय छ । शिवम् अधिकारी र दिनेश न्यौपानेले फिल्मको कथा लेखेका हुन् । पूजा र सुदर्शनले मिलेर निर्माण गरेको फिल्मको सह–निर्माता जन्मजय साम्पाङ राई हुन् । फिल्ममा वनिष शाह र मिलन श्रेष्ठको सम्पादन र सौरभ लामाको छायांकन रहेको छ ।
१९ माघमा प्रदर्शनमा आउँदा यो फिल्मले प्रदर्शनको पहिलो हप्ता नै तीनवटा सार्वजनिक विदा भेट्नेछ । रिलिजकै दिन सोनाम ल्छोहार, २२ गते शनिबार र २३ गते सरस्वती पूजाको विदा छ । अरु दिनभन्दा सार्वजनिक विदामा फिल्मको व्यापार राम्रो हुने गरेको छ । यसैले निर्माण टिमले १९ माघ रोजेको हो । यो फिल्मलाई दर्शकले लामो समयदेखि व्यग्र प्रतिक्षा गरिरहेका छन् ।
