काठमाडौं– नेपाली फिल्म ‘परेदशी २’ आगामी वर्षको दशैँमा मात्र रिलिज हुने भएको छ । यसवर्षको दशैँमा रिलिज गर्ने गरी फिल्म निर्माण गरिए पनि कोरोना महामारीका कारण चलचित्रका व्यापार नहुने देखेपछि निर्माण टिमले चलचित्र प्रदर्शन स्थगित गरिएको हो । पछिल्लो समय हलहरू पूर्णत चल्न थाले पनि ‘परदेशी २’ भने आगामी वर्षको दशैँमा मात्र रिलिज गर्ने तयारी गरिएको हो । उक्त चलचित्रको कथावस्तु दशैँसँग मेल खाने भएको दशैँको अवसर पारेर नै रिलिज गर्ने तयारी गरिएको निर्माण टिमले जानकारी दिएको छ ।
हरेक वर्षको दशैँमा फिल्म रिलिज गर्न नेपाली निर्माताहरूबीच ठूलै रस्साकस्सी हुने गरेको छ । दशैँमा लामो बिदा हुने भएकाले फिल्मको व्यापारमा फाइदा पुग्ने विश्वास निर्माताहरूमा छ । यसैले हरेक निर्माता दशैँमै फिल्म लगाउन चाहन्छन् । तर, कोरोनाका कारण गत दशैँमा फिल्मै रिलिज भएनन् । यसपटकको दशैँमा फिल्म ‘डाँडाको वर पीपल’ रिलिज भए पनि दर्शकले पत्याएनन् । यसपालीको तिहारमा रिलिज भएको बलिउड फिल्म ‘सूयवंशी’ ले हलमा दर्शक फर्काएपछि भने नेपाली निर्माताहरू जोसिएका छन् । यतिबेला एकपछि अर्को नेपाली फिल्मको प्रदर्शन मिति घोषणा भइरहेको छ । यसै मेसोमा फिल्म ‘परदेशी २’ ले पनि फिल्म प्रदर्शनको मिति प्रस्ताव गरेको हो ।
निर्माता राजेश वंशलले ‘परदेशी २’ लाई यसै वर्षको दशैँमा प्रदर्शनमा ल्याउने तयारी गरे पनि कोरोना महामारी तथा छायांकनमा ढिलाइ भएकाले प्रदर्शन गर्न असमर्थ भएको बताए । उनले फिल्मको कथा नै दशैँसँग जोडिएकाले दशैँमा प्रदर्शन गर्दा राम्रो हुन्छ भन्ने आफूहरूको धारणा रहेको प्रष्ट पारे । उनले भने, ‘अर्को वर्षको घटस्थापना वा फूलपातीमा फिल्म प्रदर्शन हुनेछ ।’ नारायण रायमाझीले निर्देशन गरेको यो फिल्म २०१५ मा आएको सुपरहिट फिल्म ‘परदेशी’ को सिक्वेल हो । नेपाल र अमेरिकामा छायांकन भएको यस फिल्ममा प्रकाश सपुत, दिलिप रायमाझी, प्रशान्त तामाङ, केकी अधिकारी, वर्षा सिवाकोटी, नीर शाह, रमा थपलिया, देवेन्द्र बब्लूलगायतको अभिनय रहेको छ । यही फिल्मबाट गायक सपुतले नायकको रूपमा डेब्यू गर्न लागेका हुन् ।
सुदिप कुँवर मुख्य सहायक निर्देशक रहेको फिल्ममा मानकृष्ण महर्जनको छायांकन, अष्ट महर्जनको द्वन्द्व, बिबि अनुरागीको संगीत, गोविन्द राई र रामजी लामिछानेको कोरियोग्राफी र दीर्घ खड्काको सम्पादन छ । निर्देशक रायमाझी पनि निर्माता रहेको फिल्मको कथा रमेश विजीले लेखेका हुन् ।
