काठमाडौं– आगामी १८ चैतबाट प्रदर्शनमा आउन लागेको फिल्म ‘पासो’को फस्र्ट लुक सार्वजनिक गरिएको छ । बिहीबार निर्माण टिमले फिल्मको फस्र्ट लुक सार्वजनिक गर्दै प्रदर्शन मिति समेत घोषणा गरेको हो । निर्माण टिमका अनुसार यो फिल्म यो वर्षको १८ चैतमा प्रदर्शन गरिने वितरक किरण श्रेष्ठले जानकारी दिए । पोष्टरमा अभिनेत्री रिस्ता बस्नेत पहिलो पटक फिल्ममा फरक भूमिकामा देखिएकी छन् । प्रायः फिल्ममा सोझी युवतीको भूमिकामा देखिएकी उनलाई नयाँ फिल्म ‘पासो’ मा अहिलेसम्मकै अलग अवतारमा प्रस्तुत गरिएको छ ।
फस्र्ट लुक पोस्टरमा रिस्तालाई मात्र स्थान दिइएको छ । एक पोस्टरमा उनको हातमा हथौडा र धारियो हतियार देख्न सकिन्छ भने रगतले शरीर राताम्मे छ । अर्को पोस्टरमा उनलाई डराएको भावमा लुकेर चिहाइरहेको देख्न सकिन्छ । एउटा पोस्टरमा उनलाई साहसी र अर्कोमा निरीह युवतीको रूपमा प्रस्तुत गरिएको छ । यी दुई पोस्टरले दर्शकमा फिल्मप्रति कौतुहलता जगाउने देखिन्छ ।
सरु र प्रमिला नाम गरेका दुई जना मिल्ने साथी एक अपराधिक गिरोहद्वारा कुनै उच्च पदस्थ व्यक्तिको शारीरिक तृष्णा मेटाउनका लागि अपहरणमा परेको कथामाथि फिल्म आधारित छ । यी दुईले आफूलाई खतरनाक परिस्थितिबाट जीवित राख्न गरेको संघर्षको कथामा फिल्म निर्माण भएको निर्देशक आर.बी पुनले जानकारी दिए । फिल्ममा कथा, पटकथा र संवाद निर्देशक पुन स्वयंको हो ।
भगवान भुजेलले निर्माण गरेको फिल्ममा वसन्त घिमिरे, अनु मुस्कान, अनुराग ढुंगाना, सरस्वती गुरुङ सह–निर्माताका रूपमा छन् ।
फिल्ममा रिस्तासँगै सुनिसा बजगाँई, रामकुमार बस्ताकोटी, प्रतिक दुलाल, प्रणव आकाशको मुख्य भूमिका छ । चलचित्रमा सूर्य दयालुको संगीत, उत्तम हुमागाँइको छायांकन, भूपेन्द्र अधिकारीको सम्पादन छ । फिल्मलाई जिजिए ग्रुप र एफडी कम्पनीले वितरण गर्नेछ ।
