काठमाडौं– आगामी ९ पुसबाट प्रदर्शनमा आउन लागेको फिल्म ‘चुरिफुरी’ को ट्रेलर सार्वजनिक भएको छ । निर्माण टिमले शुक्रबार फिल्मको ट्रेर सार्वजनिक गरेको हो । सार्वजनिक गरिएको ट्रेलरमा हाँस्य दृश्यलाई प्राथमिकता दिइएको छ । २ मिनेट ४४ सेकेण्डको ट्रेलरमा अष्ट्रेलिया जान लाग्दा र जग्गा किन्दा ठगिएकाहरूको कथालाई कमेडी शैलीमा देखाइएको छ । कमेडी फिल्म रुचाउने दर्शकलाई फिल्मले हलसम्म तान्न सक्ने ट्रेलर हेर्दा अनुमान गर्न सकिन्छ ।
फिल्ममा अभिषेक श्रेष्ठ, पूजा पन्त, शिशिर भण्डारी, सुबोध गौतम, राजिवजंग बस्नेत, पवन खतिवडा, सुनिता श्रेष्ठ, सोना बज्रचार्य, लक्ष्मी ढकाल, दीपक आचार्य, रविन्द्र झा, सुरवीर पण्डितलगायतका कलाकारहरूको अभिनय रहेको छ । अनमोल केसीको डुब्लिकेटको रूपमा चर्चित अभिषेकले यही फिल्मबाट नायकको रूपमा डेब्यू गर्न लागेका हुन् । पूजाको पनि यो पहिलो फिल्म हो ।
राहुले राइको छायांकन रहेको फिल्ममा भिमफेदी ग्रुपको कोरियोग्राफी र नविन निरौलाको सम्पादन रहेको छ । ऋषिराज आचार्य निर्देशित फिल्मको निर्मातामा निर्देशक आचार्य र रिना ढकाल छन् भने सह–निर्माता विमला भुसाल, राजेन्द्र खाती, खेमराज भण्डारी र शिव थापा छन् । सोसल कमेडी जनरामा निर्मित फिल्मको कथा, पटकथा र संवाद ऋषिराज स्वयंले तयार पारेका हुन् ।
