काठमाडौं — मोडल प्रियारानी लामा एक म्युजिक भिडियोमा राजकुमारी बनेकी छन् । रोनिश एण्ड ड्याड प्रोडक्शनले निर्माण गरेको भिडियोमा प्रियारानी राजकुमारीको भुमिकामा देखिएकी हुन् ।
गीतमा उनी मोडल रामहरी खड्काको राजकुमारीको रूपमा प्रस्तुत भएकी छन् । ‘राजकुमारी’ बोलको उक्त गीत राजधानीको क्युज हलमा एक कार्यक्रमबीच सार्वजनिक गरिएको छ ।
कार्यक्रममा निर्माण टिम र अतिथीहरूको उपस्थिति थियो । कार्यक्रममा बोल्दै मोडल प्रियारानीले हिमालको काखमा खिचिएको गीतमा प्राकृतिक अनुपमलाई मिसाइएको बताइन् ।
नेपाल पर्यटनका लागि प्रचुर संभावना बोकेको देश भएको हुँदा गीतमा देखाइएको स्थानले पर्यटन प्रवद्र्धनलाई टेवा पुग्ने उनको विश्वास छ । उक्त गीतको भिडियोलाई मनाङ, मुस्ताङलगायतका स्थामा खिचिएको छ ।
यस्तै, भिडियोका निर्देशक रूपेश थापाले नेपाली भिडियोहरू गुणात्मक रूपमा बनाउन नसकिरहेको अवस्थामा राम्रो भिडियो बनाउने कोशिश गरेको बताए । गीतमा राजकुमार र राजकुमारी कल्पना गर्ने यूवाहरूको प्रेमलाई रोमान्टिक रूपमा प्रस्तुत गरिएको छ ।
प्रियारानी र रामहरी फिचर गीतमा संगीत निरज लामाको रहेको छ । गीतको कम्पोजर र स्वर पनि निरजकै छ । खगेन्द्र भट्टराईले शब्द रचना रहेको गीतको भिडियोलाई थापाले नै छायाँकन गरेका हुन् ।
