काठमाडौं — चर्चित गीतकार तथा संगीतकार येदिन गजमेरको संगीतमा नयाँ गीत ‘यादहरूमा’को भिडियो सार्वजनिक भएको छ । गायक प्रमोद खरेलको स्वरमा सजिएको प्रेम रोमान्स र विरहले भरिएको गीत ‘यादहरूमा’को भिडियो शुक्रबार बजारमा आएको हो ।
अमेरिकामा बस्दै आएका गीतकार तथा संगीतकार येदिनले यसअघि दर्जनौँ नेपाली आधुनिक गीत तथा भजन संग्रहमा शब्द तथा संगीत दिइसकेका छन् । वैँशालु उमेरमा प्रेममा परेका एक जोडीको प्रेमिल कहानी, प्रेममा पर्दाका रमाइला यादगार क्षणहरू र एक्कासी आफ्नी प्राण प्यारीले छाडेर गएपछिको विरहका भावना र दृश्यलाई कैद गरिएको भिडियोमा रमेश दियाली र साक्षी लम्साल गज्जबसँग खुलेका छन् ।
सञ्जिव बराइलीको एरेन्ज रहेको गीतमा निशाल पौडेलको छायाँकन रहेको छ । विकाश दाहालले सम्पादन गरेको भिडियोको निर्देशन युवराज वाइवाले गरेका हुन् । यसैबीच गायक अनुप रेग्मीको स्वरमा तयार भएको लोक आधुनिक गीत पञ्चेबाजामा संगीतकार येदिनको संगीत रहेको गीत छिट्टै बजारमा आउने तयारीमा रहेको छ । विवाहको मौसमलाई लक्षित गरेर ल्याउन लागिएको पञ्चेबाजामा संगीतकार यदिनकै शब्द सिर्जना रहेको छ ।
