काठमाडौं — कोभिड संक्रमण कम भएसँगै फिल्म क्षेत्र जुर्ममुराउन थालेको छ । कोभिका कारण झण्डै दुई वर्ष ठप्प भएको फिल्म क्षेत्रमा नयाँ फिल्मको रिलिज डेट तोक्न थालिएको हो । यसैक्रमा गाउँबाट सहर आएको एउटा युवाको सहरिया बन्ने यात्रा समेटिएको फिल्म ‘चिसो एस्ट्रे’ ४ चैतमा सार्वजनिक प्रदर्शनमा आउने भएको छ । फिल्मलाई दिनेश पाल्पाली (दिन्श)ले निर्देशन गरेका हुन् ।
दिनेशले यसअघि ‘बालकृष्ण सम : अनटोल्ड स्टोरी’ निर्देशन गरेका थिएजुन काठमाडौँ पर्वतीय फिल्म महोत्सव (किम्फ)सँगै थाइल्यान्ड, क्यालिफोर्निया, चीन आदि देशका फिल्म महोत्सवमा छनोट भई विभिन्न अवार्ड जित्न सफल भएको थियो । निर्देशक पाल्पालीले फिल्मले मुख्य चार चरित्रमार्फत मानिसको अन्तरयात्राको कथालाई पर्दामा प्रस्तुत गर्ने जमर्को गरेको बताए । ‘फिल्मले गाउँबाट सहर आएर आधुनिक बन्न खोज्ने एक युवाको कथा भन्ने प्रयास गरेको छु’ पाल्पालीले भने ‘आधुनिक बन्न उसले गर्ने यात्रा र यात्राका क्रममा भेट्ने अरू यात्रुको कथा नै चिसो एस्ट्रे हो ।’
फिल्ममा दिव्यदेवले मदनको रूपमा मुख्य यात्रुको भूमिका निर्वाह गरेका छन् भने सहयात्रीको भूमिकामा छन् निकुन श्रेष्ठ, नवीन लम्साल, सुशील राज पाण्डे, रबिन तामाङ र सृष्टि श्रेष्ठ । कंगारु क्रिएसन र लोकलसिनेमाको संयुक्त ब्यानरमा निर्मित फिल्मलाई महेशबाबु तिम्सिनाले प्रस्तुत गरेका हुन् । निर्माणमा भने महेशबाबुलाई प्रवीण स्याङ्बा र शर्मिला पराजुलीले सघाएका छन् । रुपेश ढुंगाना र नवीन ढुंगाना फिल्मका सह निर्माता हुन् ।
निर्माता महेशबाबु तिम्सिनाले फिल्म मेहनत गरेर बनाएको र अब दर्शकबीच प्रस्तुत गर्न उत्सुक रहेको बताए । ‘हामीले लामै समय लिएर यो फिल्म तयार गरेका छौँ । महामारीका कारण प्रदर्शनका लागि तयार भएर पनि हामी रोकिनुप¥यो । अब चैतमा हामी आउँदछौँ’ महेशले भने । फिल्ममा दिनेशले लेखन, निर्देशनसँगै गीतकारको पनि भूमिका निर्वाह गरेका छन् । फिल्ममा संगीत अजर जंगमको छ । उज्ज्वल बस्ताकोटीको छायाँकन रहेको फिल्ममा उज्ज्वल ढकालले सम्पादन रहेको फिल्म रिच इन्टरटेनमेन्ट र जिजिए ग्रुपले वितरण गर्नेछ ।
