काठमाडौं — लोकप्रिय गायिका सीता केसी र गायक मदन केसीको युगल स्वरमा रोमान्टिक लभसङ ‘बरको शीतल छायाँ’ दर्शक तथा श्रोतामाझ आएको छ । ‘मलाई अमेरिका यही’, ‘छलछल पानी’, ‘भाग्यले नि ढाँट्यो’, ‘जिन्दगी भार भयो’ जस्ता चर्चित गीतहरुमा स्वर दिएकी गायिका सीता केसीले पछिल्लो समय आफ्नै भाई मदन केसीसँग सहकार्य गर्दै ‘बरको शीतल छायाँ’ बजारमा ल्याएकी हुन् । लोक गीतलाई अलि फरक प्रस्तुतिका साथ रोमान्टिक र मायाप्रेमको शैलीमा प्रस्तुत गरिएको गीतको रुपमा गायिका सीताले यस गीतलाई लिएकी छन् ।
उक्त गीतमा अर्जुन खड्का बाबुको शब्द रहेको छ भने दीपक घर्तीको संगीत रहेको छ । सबिन सेन्चुरीको संगीत संयोजन रहेको गीतको मिक्सिङ कुमार रानाले गरेका छन् । मारुनी रेकर्डिङ स्टुडियोमा रेकर्ड गरिएको यो गीतको म्यूजिक भिडियोमा भने राजन केसी र सगुन शाहीलाई फिचरिङ गरिएको छ । वीरेन्द्र भट्टको छायाँकन रहेको यस भिडियोको सम्पादन विकास ज्ञवालीले गरेका हुन् भने मदन खड्काको निर्देशन रहेको छ । ‘बरको शीतल छायाँ’ गीतको म्यूजिक भिडियोलाई सीता केसीको अफिसियल यूट्यूब च्यानलबाट सार्वजनिक गरिएको हो ।
