काठमाडौं – गायिका ममता गुरुङ र नेशन पुनको नयाँ गीतको भिडियो सार्वजनिक भएको छ । भावसागर इन्टरटेन्मेन्टको प्रस्तुति रहेको ‘तिमी मेरो जीवनमा’ बोलको गीतको भिडियो सार्वजनिक गरिएको हो ।
सार्वजनिक उक्त गीतमा स्वर दिएका नेशन पुन र ममता दुवै नेपाल आइडल सिजन–३ बाट चर्चामा आएका प्रतिस्पर्धी हुन् । गीतमा शब्दरचना अम्बिका गुरुङले गरेकी हुन् । गीतमा शंकर थापा ‘स्माइल’को लय सिर्जना र सन्देश रुचालको संगीत संयोजन गीतमा समावेश छ । भिडियोलाई निशान घिमिरेले निर्देशन गरेका हुन् । रोमान्टिक भाव बोकेको ‘तिमी मेरो जीवन’को छायाँकन म्याग्दीको राखु भन्ने ठाउँमा गरिएको छ । भिडियोमा राखुका रमणीय दृश्यहरू कैद गरिएको छ ।
भिडियोमा निशल पौडेलको सिनेम्याटोग्राफी रहेको छ भने पोस्ट प्रोडक्सन र्याड स्टुडियोमा गरिएको हो । सुधीर श्रेष्ठ र सुशीला थापा भिडियोमा फिचर्ड छन् । सुधीर अहिलेका म्युजिक भिडियोका व्यस्त मोडल हुन् । सुशीला थापा पनि भावसागर इन्टरटेन्मेन्टकै प्रस्तुति रहेको गीत ‘कति माया गर्छौ’ गीतबाट चर्चामा आएकी हुन् ।
