काठमाडौ — झण्डै तीन दर्जन म्युजिक भिडियोमा मोडलिङ गरिसकेकी साक्षी लम्साल अझै मोडलिङप्रति विस्वस्त छैनन् । र, भन्छिन्, ‘मोडलिङमा म करिअर नै देख्दिनँ ।’ साक्षी दुई दर्जनकै हाराहारीमा एडफिल्ममा समेत मोडलिङ गरिसकेकी छन् । ‘भ्वाइस ओभर’ कलाकार भएर यस क्षेत्रमा पाइला रखेकी उनी भन्छिन्, ‘करिअर नभएपनि कलाकारिता क्षेत्र मेरो सौख र रहर हो ।
पैसाका लागि त जब गर्दैछु ।’
साक्षीले रहरका बाबजुद पाकिस्तानी सिरियल ‘दिल बन्जरा’, सेभ द चिल्ड्रेन ईन नेपालको निर्माणमा बनेको सचेतनामुलक भिडियो ‘ईम्पावर वोमन गल्र्स’मा पनि अभिनय गरेकी छन् । कान्तिपुर र जनता टेलिभिजनमा कार्यक्रम प्रस्तोताको रूपमा समेत काम गरेकी साक्षी भन्छिन्, ‘फिल्ममा अफर आए गर्न तयार छु ।’ हुन त यसअघि पनि उनले एक फिल्ममा अभिनय गरेकी थिइन् । उनकै भाषाका भन्ने हो भने त्यो फिल्म फ्लप भयो । उनी भन्छिन्, ‘अबचाहिँ ब्यानर, टिम र कथावस्तु राम्रो भएको फिल्मका अफर आयो भने काम गर्न तयार छु । मलाई भूमिकामा प्रोब्लम छैन ।’
