काठमाडौं– नेपाली कांग्रेसको १४औँ महाधिवेशनअन्तर्गत महामन्त्री पदको परिणाम प्राप्त भएपछि प्रतिनिधिहरूले विवेकको प्रदर्शन गरिएको भन्दै प्रशंसा सुरु भएको छ । बिहीबार सम्पन्न मत गणनाअनुसार महामन्त्री पदका गगनकुमार थापा र विश्वप्रकाश शर्मा विजयी भएका थिए । कांग्रेसको सभापति र उपसभापति पदमा करिब करिब प्यानल मत हालिएको अवस्थामा महामन्त्रीमा भने प्रतिनिधिले विल्कुलै गुट नहेरी मतदान गरेको भन्दै कांग्रेस शुभेच्छुक तथा समर्थकले प्रतिनिधिहरूको निर्णयको प्रशंसा गरेका हुन् ।
२७ मंसिरमा भएको मतदानको बिहीबार मतगणना गरिएको थियो । पार्टी केन्द्रीय कार्यालय सानेपामा गरिएको मतगणनाको अन्तिम परिणामअनुसार थापाले ३ हजार २३ र शर्माले १ हजार ९८४ मत प्राप्त गरेका थिए । त्यसैगरी महामन्त्रीका अन्य उम्मेदवारहरू क्रमशः डा प्रकाशशरण महतले १ हजार ५५६, प्रदीप पौडेलले १ हजार ३९३, डा.मीनेन्द्र रिजालले ८०९ र डा. राजाराम कार्कीले १०६ मत प्राप्त गरेको कांग्रेसको केन्द्रीय निर्वाचन समितिले जनाएको छ । चार हजार ६८२ मत गणनामा भएकोमा सबैभन्दा बढी मत थापाले ल्याएका थिए भने शर्माले दोस्रो स्थानमा जित हासिल गरेका हुन् ।
महामन्त्रीमा निर्वाचित थापा सभापतिका उम्मेदवार डा.शेखर कोइरालाको समूहबाट निर्वाचन लडेका थिए भने शर्मा प्रकाशमान सिंहको समूहबाट निर्वाचन लडेका थिए । पहिलो चरणमा कोइरालाले कुल १ हजार ७०२ मत मात्र प्राप्त गर्दा महामन्त्रीमा थापाले भने ३ हजार मत कटाएका हुन् । कोइराला समूहकै डा. रिजालले भने एक हजार मत पनि कटाउन सकेनन् । शर्मा उम्मेदवार रहेको समूहका सभापतिका उम्मेदवार सिंहले भने जम्मा ३७१ मत पाएका थिए । तर, शर्माले भने दोस्रो सर्वाधिक मत पाएर निर्वाचित भएका छन् ।
सभापतिमा निर्वाचित शेरबहादुर देउवाको समूहबाट निर्वाचन लडेका महामन्त्री पदका उम्मेदवारहरू भने विजयी हुन सकेनन् । उनको समूहबाट महामन्त्रीमा प्रकाशशरण महत र प्रदीप पौडेल उम्मेदवार बनेका थिए । यसअघि उपसभापति पदमा पनि मिश्रित नै नतिजा आएको थियो । उपसभापतिमा देउवा समूहका पूर्णबहादुर खड्का र कोइराला समूहका धनराज गुरुङ विजयी भएका थिए । गुरुङले देउवा समूहका अर्का उम्मेदवार विजयकुमार गच्छदारलाई २ मतले पछि पार्दै विजयी बनेका थिए ।
हालसम्म प्राप्त नतिजाले यसपटकको कांग्रेस महाधिवेशनमा प्रतिनिधिहरूले विवेकपूर्ण निर्णय गरेको भन्दै प्रशंसा भइरहेको छ । उनीहरू पार्टीभित्रको गुटविरुद्ध मत जाहेर गरेको पनि उनीहरूको प्रतिक्रिया छ । कांग्रेसका शुभेच्छुक तथा समर्थकहरूले प्रतिनिधिहरूले नेताहरूको आदेश नमानी पार्टीमा योग्य व्यक्ति छान्न विवेक प्रयोग गरेको भन्दै खुसी व्यक्त गरेका छन् । सामाजिक सञ्जालमा अधिकांशले थापा र शर्मा विजयी भएको खुसी व्यक्त गर्दै यसले सकारात्मक सन्देश दिएको प्रतिक्रिया दिएका छन् ।
महाधिवेशन प्रतिनिधिहरू गुटको राजनीतिमा अल्झिएको भए शर्माले जित हासिल गर्ने कुरा कुनै पनि कोणबाट संभव थिएन । सुरुदेखि नै देउवा समूहमा रहेको उनी महामन्त्रीको टिकट नपाएपछि सिंहको प्यानलमा पुगेका थिए । देउवा प्यानलबाट महामन्त्रीको बलियो दाबेदार मानिएका उनी अर्का नेता कृष्णप्रसाद सिटौलाको समूहबाट प्रदीप पौडेलले मौका पाएपछि उनी कमजोर मानिएका सिंहको समूहबाट उम्मेदवार बनेका थिए । देउवा–सिटौलाको बलिया साथ रहेको पौडेल निर्वाचित हुने आँकलन गरिए पनि प्रतिनिधिले भने त्यसलाई अस्विकार गरिदिएका छन् । यसलाई कतिपयले ‘विद्रोहको अनुमोदन’को रूपमा पनि व्याख्या गरेका छन् ।
महामन्त्रीमा थापा र शर्मा निर्वाचित भएपछि विशेष गरेर पार्टीका युवापंक्तिले खुसी व्यक्त गरेका छन् । युवाहरूले पार्टी कार्यालय परिसरमै थापा र शर्माको पक्षमा नाराबाजीसमेत गरेका थिए । उनीहरूले पार्टीभित्र युवाहरूको प्रवेशले अब नयाँ उत्साह र जोस जाँगर थपिने प्रतिक्रिया दिएका छन् । महामन्त्रीमा निर्वाचित भएपछि थापाले आफूले महाधिवेशनमा पाएको मतलाई न्याय गर्ने बताएका छन् । पत्रकारहरूसँग कुरा गर्दै थापाले आफूलाई एक दिन पनि चुक्ने र थाक्ने सुविधा नभएको बताए । ‘यो मतप्रति मैले न्याय गर्नुपर्छ । मसँग एक दिन पनि चुक्ने सुविधा छैन, एक दिन पनि थाक्ने सुविधा छैन । म अझै इमान्दारिपूर्वक, परिपक्व ढंगले जिम्मेवारी निर्वाह गर्छु,’ उनले भने ।
यो महाधिवेशनले कांग्रेसलाई सम्पूर्ण रूपमा नेतृत्व बदल्ने अवसर दिए पनि महाधिवेशनले त्यो म्याण्डेट नदिएको भन्दै यसलाई स्वीकार्नुपर्ने बताए । आफूले महामन्त्रीको हैसियतले सभापतिलाई काम गर्न बल र तागत पुर्याउने भन्दै गल्ती गर्न लागे घचघच्याउने पनि थापाले बताए । अर्का महामन्त्री शर्माले आफ्नो जित कांग्रेसलाई रूपान्तरित गर्ने यात्राको प्रारम्भ भएको बताएका छन् । सञ्चारकर्मीहरूसँग कुरा गर्दै भने, ‘यो एउटा व्यक्तिको विजय पनि होइन, गुटको विजय पनि होइन । सिंगो नेपाली कांग्रेसलाई रूपान्तरित गर्ने, नयाँ ढंगले सुरुवात गर्ने यात्राको प्रारम्भ हो ।’
डा.रिजालले दिए राजीनामा
कांग्रेस महामन्त्रीमा पराजित भएपछि रक्षामन्त्री डा.मीनेन्द्र रिजालले मन्त्री पदबाट राजीनामा दिएका छन् । मतपरिणाम सार्वजनिक भएलगत्तै प्रधानमन्त्री शेरबहादुर देउवालाई भेटेर उनले राजीनामा पत्र बुझाएका थिए । डा.कोइराला समूहबाट महामन्त्रीको उम्मेदवार बनेका उनी पाँचौँ स्थानमा सीमित भएका थिए । राजीनामा पत्रमा कांग्रेस महाधिवेशनपछि आफूलाई मन्त्री भइरहन नैतिकताले नदिने उल्लेख गरेका छन् ।
राजीनामा बुझाएपछि उनले रक्षामन्त्रालयमा आयोजित पत्रकार सम्मेलनमा आफू सामाजिक काममै सक्रिय भइरहने बताएका छन् । अबका दिनमा जे गर्छु भन्ने लागेको थियो, त्यसका लागि जे राजनीति आवश्यक थियो, त्यो आफूसँग नरहेकाले राजीनामा दिने निर्णय गरेको उनको भनाइ छ । उनले भने, ‘निकै ठूलो मतान्तरले हारिसकेपछि आफ्नो अनुहार त राम्रो छ भन्न बहाना खोज्नु राम्रो होइन । चार वर्ष कांग्रेस चल्नुपर्छ, त्यसका लागि मेरो यो रक्षामन्त्रीबाट राजीनामा दिने निर्णय उपयुक्त छ ।’
