काठमाडौं — गायिका रुशाली भट्टराईको स्वरमा नयाँ गीत ‘गुराँसको पछ्यौरी’को भिडियो सार्वजनिक गरिएको छ । लोकशैलीको उक्त गीतमा राजेन्द्र थापा र राजनराज शिवाकोटीको शब्द तथा राजनराज शिवाकोटीकै संगीत रहेको छ । राजन इशानले संगीत संयोजन गरेको गीतले नेपालीपन प्रस्तुत गर्न खोजेको छ ।
एमबिबिएसको बिद्यार्थी रुशाली भट्टराईको यो पहिलो गीत हो । सानैदेखि गायनमा रुचि राख्ने भट्टराई पढाइबाट केही समय निकालेर गीत संगीतलाई समय दिँदै जाने योजनामा छिन् । उक्त गीतको भिडियो उत्कृष्ट बनेको छ । यसलाई दर्शकले मन पराउनेमा गायिका भट्टराई आशाबादी छिन् ।
निशान घिमिरेले निर्देशन गरेको भिडियोमा डाँडाकाँडा तथा हिमाली दृश्यलाई सुन्दर रूपमा सागर प्रधानले क्यामेरामा कैद गरेका छन् । भिडियोमा मोडल गरिमा शर्मा फिचर्ड छिन् । सन्तोषराज बाहकले कोरियोग्राफी गरेको भिडियोको सम्पादन निर्देशक घिमिरेले नै गरेका हुन् ।
