काठमाडौं– नेपाल कम्युनिस्ट पार्टी माओवादी केन्द्रको आठौँ महाधिवेशन आइतबारदेखि सुरु भएको छ । यसअघि प्रथम राष्ट्रिय सम्मेलन गर्ने भेनर प्रचार गरिए पनि अन्तिम समयमा आएर महाधिवेशनमा परिणत गरिएको थियो । महाधिवेशनको माओवादी केन्द्रका अध्यक्ष पुष्पकमल दाहालले उद्घाटन गरेका छन् । राजधानी काठमाडौंमा सुरु भएको महाधिवेशनमा सुरुमा कसैलाई अतिथिका रूपमा निम्तो नदिने भनिएको थियो । यद्यपि आइतबारको उद्घाटन सत्रमा प्रमुख राजनीतिक दलका शीर्ष नेताहरू सहभागी भई शुभकामना दिएका थिए ।
कमलादीस्थित प्रज्ञा भवनमा आयोजित उद्घाटन सत्रमा अध्यक्ष दाहालले पानसमा बत्ती बालेर महाधिवेशनको उद्घाटन गरेका थिए । उद्घाटन सत्रमा प्रधानमन्त्री एवं नेपाली कांग्रेसका सभापति शेरबहादुर देउवा, नेकपा एकीकृत समाजवादी)का अध्यक्ष माधवकुमार नेपाल, नेकपा एमालेका महासचिव शंकर पोखरेल, जनता समाजवादीका अध्यक्ष उपेन्द्र यादव, राष्ट्रिय प्रजातन्त्र पार्टीकी महामन्त्री कुन्ती शाहीलगायत विभिन्न राजनीतिक दलका नेताहरूकोसमेत उपस्थिति रहेको थियो ।
चिनियाँ कम्युनिस्ट पार्टीका नेता माओत्से तुङको १२९औँ जन्मजयन्तीका अवसरमा महाधिवेशनको उद्घाटन गरिएको हो । अध्यक्ष दाहालले चिनियाँ कम्युनिस्ट पार्टीका नेता माओको तस्बिरमा माल्यापर्ण गरेका थिए । ‘नयाँ क्रान्तिकारी विचार र क्रान्तिकारी पार्टी निर्माणका लागि नेपाल कम्युनिस्ट पार्टी माओवादी केन्द्रको ऐतिहासिक प्रथम राष्ट्रिय सम्मेलन’ भन्ने मूल नारा तय गरेको छ । यसअघि राष्ट्रिय सम्मेलनको आयोजना गरेको माओवादीले शनिबार मात्रै महाधिवेशनमा परिवर्तन गरेको हो । महाधिवेशनमा देशभरबाट एक हजार ६३१ जना प्रतिनिधिको सहभागिता छ ।
द्वन्द्वकालीन नेताको खोजी
माओवादी केन्द्रको आठौँ राष्ट्रिय महाधिवेशनको उद्घाटन सत्रमा प्रमुख राजनीतिक दलका शीर्ष नेताको उपस्थिति थियो । यद्यपि तत्कालीन माओवादी जनयुद्धकालीन नेताहरू भने नहुँदा खल्लो महसुस भएको सहभागीहरूले बताएका छन् ।
सशस्त्र द्वन्द्वकालीन नेताहरू सिपी गजुरेल उपस्थित हुँदा डा बाबुराम भट्टराई, मोहन वैद्य (किरण), नेत्रविक्रम चन्दलगायत नेताहरू उपस्थित थिएनन् । उनीहरू उपस्थित भएको भए सुनमा सुगन्ध हुन्थ्यो भन्ने नेता तथा कार्यकर्ताको मनोभावना रहेको छ । द्वन्द्व सुरु गर्ने समयका तत्कालीन केन्द्रीय समितिमा रहेकामध्ये १७ जना केन्द्रीय सदस्य एवं नेताहरूमध्ये यतिबेला अधिकांश माओवादीभन्दा बाहिर छन् । यद्यपि, महाधिवेशन हलले एकीकृत माओवादीको परिकल्पना गरेको छ ।
क्रान्तिकारी कम्यनिस्ट आन्दोलनको मूलप्रवाहका रूपमा रहेको माओवादी विभाजन, टुट फुट तथा विघटनको प्रक्रियाबाट अगाडि बढेको छ । तत्कालीन एकता केन्द्रबाट द्वन्द्व सुरुआत गर्दा माओवादीको रूपमा स्थापित भएको माओवादीका शीर्ष नेताहरू वैद्य, भट्टराई, चन्द र रामबहादुर थापा फरक राजनीतिक दलमा लागेका छन् ।
