काठमाडौं — नवौं म्युजिक खबर म्युजिक अवार्ड–२०२१ मा वरिष्ठ गीतकार राजेन्द्र थापालाई दीर्घ साधना सम्मानद्वारा सम्मानीत गरिएको छ । संस्कृति, पर्यटन र नागरिक उड्डयन मन्त्री प्रेमबहादुर आलेको प्रमुख आतिथ्यतामा राजधानीमा सम्पन्न कार्यक्रममा थापालाई ३० हजार ५५५ रूपैयाँ नगदसहित दीर्घ साधना सम्मान अर्पण गरिएको थियो ।
कार्यक्रममा गायिका पूर्णिमा लामा र गायक सरोज कोइराला सर्वोत्कृष्ट गायक÷गायिकाको अवार्ड पाए । गायिका लामाले ‘एक पल्ट भनन’ गीतबाट अवार्ड चुमेकी थिइन् भने गायक कोइरालाले ‘माया केवल माया’बाट अवार्ड पाएका हुन् । कार्यक्रममा वरिष्ठ गायक रामप्रसाद खनाललाई म्युजिक खबर डायस्पोरा संगीत सम्मान प्रदान गरिएको छ भने लोकप्रिय गायक हेमन्त शर्मा र लोकप्रिय गायिका सीता थापालाई म्युजिक खबर दशकको स्रष्टा सम्मान प्रदान गरिएको छ ।
त्यस्तै, गायक राजु ढकाललाई म्युजिक खबर युवाप्रतिभा संगीत सम्मान प्रदान गरिएको छ । बालगायिका सफलता श्रेष्ठलाई म्युजिक खबर बालप्रतिभा प्रोत्साहन सम्मान प्रदान गरिएको थियो ।कार्यक्रममा गायक भोजराज काफ्ले, गायिका अन्जु गौतम, गायिका पुष्पा बोहरा, गायक रविन लामिछाने, गायक सागर गुरुङ, गायक रमेशराज भट्टराई र गायक छिरिङ भुटियाले सांगीतिक प्रस्तुति दिएको कार्यक्रममा विभिन्न विधामा कलाकारलाई अवार्ड प्रदान गरिएको थियो ।
