काठमाडौं – अभिनेता प्रदीप खड्का र अभिनेत्री पूजा शर्मा अहिले चर्चामा रहेका कलाकार हुन् । यी दुईले चलचित्र ‘प्रेमगीत’मा एकसाथ काम गरेका थिए । यो चलचित्रले दुवैलाई चलचित्र क्षेत्रमा स्टार बनायो । ‘प्रेमगीत’ रिलिज हुनुअघिसम्म प्रदीप र पूजा दुवैको करिअर सुखद् थिएन । तर, यो चलचित्रमा काम गरेपछि यी दुवै कलाकार स्थापित भए । ‘प्रेमगीत’को प्रदर्शनपछि प्रदीप र पूजाबीच मनमुटावको खबर समेत सार्वजनिक भयो ।
यसपछि यी दुईले एकसाथ काम गरेका छैनन् । दर्शकले प्रेम र गीतको जोडीलाई एकसाथ पर्दामा हेर्न त चाहेका छन्, तर त्यो अहिलेसम्म जुरेको छैन । पूजाले आफू प्रदीपसँग काम गर्न तयार भएको बताएकी छन् । उनले भनिन्, ‘प्रदीप त मेरो बेष्ट हुन् । उनीसँग काम गर्न त म सधैं तयार छु ।’ यो जोडीलाई लिएर चलचित्र बनाउन निर्माताहरू पनि उत्सुक छन् । तर, अझै पनि कुनै निर्माताले प्रेम र गीतको जोडीलाई एकसाथ ल्याउन सकेका छैनन् । ‘प्रेमगीत’को तेस्रो सिरिज समेत तयार भएर रिलिजको संघारमा छ । तर, प्रदीप लगातार यो चलचित्रको सिरिजमा देखिएपनि पूजा भने देखिएकी छैनन् ।
