काठमाडौं — सञ्चारकर्मी गीता अधिकारी नयाँ गीत ‘श्वास फेरी’ सार्वजनिक भएको छ । योगेशकाजीको स्वर, संगीत र एरेञ्ज रहेको गीतको भिडियो बुधबार राजधानीमा एक कार्यक्रमबीच बरिष्ठ संगीतकार राजु सिंहले सार्वजनिक गरेका थिए ।
गीत सार्वजनिक कार्यक्रममा कलाकार तथा गीतकार लय संग्रौला, वरिष्ठ कलाकार उत्तम केसी, गीतकार संघका उपाध्यक्ष वसन्त वित्यासी थापा, कीर्तिमानी संगीतकार सन्तोष श्रेष्ठ, गायक तथा संगीतकार योगेशकाजी साहित्यकार तथा गीतकार गणेश सुवेदी, साहित्यकार शैलेन्द्र चापागाईं, निर्देशक राजु गिरी, नायिका तथा गायिका सारिका घिमिरेलगायतको उपस्थिति थियो । भिडियोमा श्याम खत्री तथा भीष्म फुलाराको निर्देशन र सुनिता बस्नेतको कोरियोग्राफी रहेको छ ।
गीतको भिडियोमा मनमाया महर्जन, राजन वैश्य, ऋतिका सापकोटा, सिएस साउद, रमेश सिंह लगायतको अभिनय छ । यमबहादुर चौधरीको छायाँकन रहेको भिडियोमा शोखिन तिम्लिसीनाको सम्पादन र सरिता पुरीको शृँगार छ । वियोगान्त शैलीको गीत निक्कै मार्मिक बनेको छ । गीता अधिकारीका यसअघि आधा दर्जन गीत सार्वजनिक भइसकेका छन् । नयाँ गीतलाई लिएर उनी उत्साहित छिन् । आफ्ना अन्य गीतलाई जस्तै यो गीतले पनि सबैको माया पाउनेमा आफू आशावादी रहेको उनले बताइन् । सञ्चार जगतमा सक्रिय रहँदै आएकी अधिकारी गीतकारका रूपमा पनि परिचय बनाउँदै आएकी छन् ।
