काठमाडौं(प्रस)— गीतकार घनबहादुर थापाले नयाँ सांगीतिक कोसेली ‘तिमीलाई नै’ लिएर आएका छन् । गीतमा गायक किरण भुजेल र गायिका मेलिना मैनालीको युगल स्वर रहेको छ । गीतकार थापाको शब्द रचना रहेको उक्त गीतको भिडियोलाई इनाक्षी इन्टरटेनमेन्ट अष्ट्रेलियाको युट्युब च्यानलमार्फत हालै सार्वजनिक गरिएको हो । दिपकराज विश्वकर्माले निर्देशन गरेको भिडियोमा गायक किरण र गायिका मेलिनाकै अभिनय रहेको छ ।
इनाक्षी इन्टरटेनमेन्टमार्फत आएका गीतहरूले नेपाली सांगीतिक फाँटमा लोकप्रियता हासिल गरेको र गीत पनि दर्शक श्रोताले रुचाउने निर्देशक दिपकराजले विश्वास व्यक्त गरेका छन् । गीतमा संगीत, एरेन्ज र मिक्सिङ दिपकराजकै रहेको छ ।
काठामाडौंको साँखु क्षेत्रमा रमणीय दृश्यसहित छायाँकन गरिएको गीतको भिडियोमा केशवराज भट्टको कोरियोग्राफी रहेको छ । अनिता ग्वाछाको श्रृँगार र अमन बडुको छायाँकन रहेको भिडियोको सम्पादन डिन्सन शाहले गरेका छन् । दर्शकको साथ र माया पाए आगामी दिनमा अझै मिहिनेत गरी मनोरञ्जनात्मक साथै विशेष सन्देशमूलक गीत ल्याउने गीतकार थापाले बताए ।
