नवलपुर– गण्डकी प्रदेशका मुख्यमन्त्री कृष्णचन्द्र नेपाली पोखरेलले सहकारीले ऋण लगाएर ब्याज मात्रै खाने परिपार्टीको अन्त्य गर्नुपर्ने धारणा व्यक्त गरेका छन् । नवलपरासी (बर्दघाट–सुस्तापूर्व) को गैँडाकोटमा भूतपूर्व सैनिक जनकल्याणकारी संस्थाको नवनिर्मित भवनको उद्घाटन गर्दै मुख्यमन्त्री पोखरेलले यस्तो धारणा राखेका हुन् । उनले देशका सहकारीले ऋण लगाएर ब्याज मात्रै खाने परिपार्टीको विकास भएकोले यस्तो परीपाटीको अन्त्य गरी लगानीलाई उत्पादनशिल क्षेत्रमा लगानी गर्नुपर्ने बताए उनले भने, ‘सहकारीमा थुप्रिएको अर्बौँ रूपैयाँलाई उत्पादनमूलक क्षेत्रमा लगानी गर्नुपर्छ । उनले देशका विभिन्न सहकारीहरूले अर्बौँ रूपैयाँ पैसा थुपारेर मात्र बस्ने काम गरेको बताए ।
मुख्यमन्त्री पोखरेलले हामीसँग भएको पैसालाई सञ्चित गरेर राख्ने र विदेशीसँग सहयोगको याचना गर्ने बानी परेको बताए । उनले यस्ता सञ्चीत सहकारीका लगानीहरूलाई संस्थाहरूले उत्पादनमूलक क्षेत्रमा लगानी गर्नुपर्ने समय आएको बताए । मुख्यमन्त्री पोखरेलले देशका हरेक आन्दोलन तथा परिवर्तनमा भूतपूर्व सैनिकको महत्वपूर्ण भूमिका रहेको बताउँदै युद्धको प्रत्येक मोर्चामा आफ्नो बहादुरी प्रदर्शन गरेर विश्वमा नै नेपाललाई चिनाउने काम गरेकाप्रति उनीहरूको प्रशंसा गरे । उनले सैनिकको ज्ञान, सीप र उनीहरूको अनुभवलाई प्रयोग गरेर सरकारले नयाँ नेपाल निर्माणमा जुट्न आग्रह गरे । देशमा सूचना र प्रविधि तथा आधुनिकीकरण भित्र्याउन भूतपूर्व सैनिकको ठूलो देन रहेको पोखरेलको भनाइ छ ।
कार्यक्रममा भूपू सैनिक संस्थाको भवन निर्माण गर्न चन्दा प्रदान गर्ने ३३९ जना चन्दादातालाई मुख्यमन्त्री पोखरेलसहितका व्यक्तिहरूले सम्मान गरेका थिए । कार्यक्रममा भूतपूर्व सैनिक जनकल्याणकारी संस्थाका अध्यक्ष गुरुबहादुर थापाले संस्थाको भवन निर्माण गर्न सहयोग पुर्याउने संघसंस्था र व्यक्तिलाई धन्यवाद व्यक्त गरेका थिए । सो क्रममा गैँडाकोट नगरपालिकाकी उपप्रमुख विष्णुकुमारी कँडेल, वडा नम्बर ४ का वडाध्यक्ष कृष्णप्रसाद न्यौपाने, संस्थाका निवर्तमान अध्यक्ष नरेन्द्रबहादुर खड्काले आ–आफ्नो विचार राखेका थिए ।
