काठमाडौं — पछिल्लो समय म्युजिक भिडियोमा ब्यस्त मोडल तथा अभिनेता नरेन खड्का ‘म’ नामक फिल्ममा अनुबन्धित भएका छन् । सुवर्ण थापाको निर्देशनमा सोमबारदेखि काठमाडौंमा सुटिङ सुरु भएको फिल्ममा नरेन प्रमुख भूमिकामा रहेका छन् । नरेनसँगै फिल्ममा निशा अधिकारी अपोजिट भूमिकामा देखिने छिन् । लामो समयपछि निशा अभिनयमा कम्ब्याक भएकी हुन् ।
कान्तिपुर फिल्म एकेडेमीको प्रस्तुत रहेको ‘म’ को निर्माण घोषणा दुई बर्ष अघिनै भएको थियो । कोरोना भाइरसका कारण संसारै ठप्प भएकाले केही दृश्य खिचिएको भएतापनि सो फिल्मको सुटिङ पूरा भएको थिएन । अहिले पूरै नयाँ कलाकार तथा प्राविधिकका साथमा ‘म’को सुरुदेखि नै सुटिङ थालिएको निर्माण पक्षले जनाएको छ ।
कान्तिपुर फिल्म एकेडेमीका सिईयो प्रकाश पुरीको लेखन रहेको फिल्ममा नरेनका साथमा सविन श्रेष्ठ, निशा अधिकारी, सरोज खनाल, सरिता लामिछाने, रुविना थापा, प्रमोद अग्रहरि, निराजन प्रधानलगायतको अभिनय रहने बताइएको छ । बिमला गुरागार्इँ निर्माता रहेको फिल्मले सामाजिक कथा प्रस्तुत गर्ने निर्देशक थापाले जनाकारी दिएका छन् । ‘हमेशा’,‘परदेशी’लगायतका सुपरहिट फिल्मका अभिनेता नरेन पछिल्लो समय फिल्मसँगै म्युजिक भिडियो तथा बिज्ञापनमा समेत ब्यस्त छन् । हालै कर्णाली भेगको कथामा ‘बुलाकी’ फिल्मको सुटिङ सकाएका उनले ‘म’ को स्क्रिप्ट तथा टिम मन परेकाले आफू आशावादी रहेको बताएका छन् ।
