काठमाडौं — अभिनेत्री तथा फिल्म निर्मात्री झरना थापाको निर्देशनमा बनेको फिल्म ‘ए मेरो हजुर ४’ को टिजर सार्वजनिक भएको छ । शुक्रबार बुढासुब्बा डिजिटलको आधिकारिक युट्युब च्यानलमार्फत् फिल्मको टिजर सार्वजनिक भएको हो । अनमोल केसी र सुहाना थापाको मुख्य भूमिका रहेको यो फिल्ममा अभिनेता सलोन बस्नेतको पनि अभिनय देख्न सकिन्छ ।
सुनिल कुमार थापा प्रोडक्सनको ब्यानरमा फिल्ममा झरना थापा र छेतेन गुरूङको कथा छ । यो फिल्म गत भदौ १८ गते रिलिज हुने भनिएको थियो। तर विभिन्न कारणले यसको रिलिज मिति सर्यो र आगामी चैत २५ रिलिज हुने भनिएको थियो । तर, टिजर रिलिज भएसँगै यो फिल्म आगामी २०७९ साल, वैशाख १ गतेदेखि प्रदर्शनमा आउने भनिएको छ ।
ए मेरो हजुर सुरूमा शलिनमान बानियाँ र साम्राज्ञी राज्यलक्ष्मी शाहको मुख्य भूमिका थियो। यो फिल्मको व्यापक सफलतापछि झरना थापाले अनमोल र सुहानालाई लिएर ए मेरो हजुर ३ निर्माण गरेकी थिइन् । ए मेरो हजुर ३ ले पनि राम्रै व्यापार गरेपछि अनमोल र सुहानाकै जोडीलाई लिएर उनले ए मेरो हजुर ४ बनाएकी हुन् । यसको निर्माण पहिल्यै सकिए पनि कोरोनाका कारण रिलिज मिति सरेको सर्यै थियो ।
