काठमाडौं — अभिनेत्री स्वस्तिमा खड्काको भूमिका रहेको दक्षिण भारतीय फिल्म ‘थिरीमाली’को ट्रेलर सार्वजनिक भएको छ । मलयालम भाषाको यो फिल्मको ट्रेलर हालै सार्वजनिक भएको हो । दुई मिनेट ४१ सेकेन्डको ट्रेलर युट्युबमार्फत सार्वजनिक गरिएको छ । यो फिल्म राजीव शेट्टीद्वारा निर्देशित हो भने निर्माण एसके लरेन्सले गरेका हुन् ।
जेभियर एलेक्स र राजीव शेट्टीको लेखनमा बनेको फिल्ममा मलयालम फिल्म उद्योगका चर्चित अभिनेता बिबिन जर्ज मुख्य भूमिकामा छन् । त्यस्तै जोनी एन्टोनी र धर्मजान बोलगट्टी पनि यसका प्रमुख पात्र हुन् । ट्रेलरमा नेपालका थुप्रै ठाउँका दृश्यहरू देख्न सकिन्छ । जसमा काठमाडौं, पोखरा र लुक्लाका धेरै दृश्य देखिन्छ । ट्रेलरमा अभिनेता माओत्से गुरुङको एक झलक पनि देख्न सकिन्छ । कमेडी जनराको यो फिल्म सन् २०२२ मा रिलिज हुने भनिएको छ ।
