काठमाडौं — बलिउडको बक्स अफिसमा सफल मानिएको ‘पुष्पाः द राइज’ को हिन्दी संस्करणपछि अल्लु अर्जुनको एउटा तेलेगू फिल्म पनि हिन्दी भाषामा आउने भएको छ । ‘पुष्पाः द राइज’ले बलिउडमा व्यवसायी तहल्का मच्चाएको थियो । त्यसैबाट हौसिएर अर्जुनले आफ्नो अर्को तेलेगू फिल्मलाई हिन्दी भाषामा ल्याउन लागेको बताइएको छ ।
भारतीय पत्रिकार इन्डिया टुडेका अनुसार पुष्पाले उत्तरी भारत र अन्य ठाउँमा पाएको सफलता देखेपछि अल्लुको फिल्म ‘अला वैकुन्ठपुरमलो’को हिन्दी संस्करण बनाउने निर्णय निर्माताहरूले गरेका हुन् । ‘अला वैकुन्ठपुरमलो’नयाँ फिल्म भने होइन । यो सन् २०२० मै रिलिज भएको फिल्म हो । जसले दक्षिण भारतमा राम्रो सफलता पाएको थियो । अहिले पुष्पाले उत्तरी भारतका हलमा तहल्का मच्चाएको देखेपछि ‘अला वैकुन्ठपुरमलो’का निर्माण टोलीले यसलाई हिन्दीमा डब गरेर फेरि रिलिज गर्ने भएका छन् ।
भारतीय मिडियाका अनुसार उक्त फिल्म हिन्दी भाषामा भएपनि यसको नाम भने फेरिने छैन । यो अला वैकुन्ठपुरमलो नाममै रिलिज हुने बताइएको छ । जुन फिल्म आगामी जनवरी २२ मा रिलिज हुने बताइएको छ । अल्लु अर्जुनको फिल्म हलमा लाग्ने भएपछि यही समय आसपास रिलिज हुन लागेका बलिउड फिल्मलाई चुनौती हुने अनुमान समेत फिल्म समीक्षकहरूले गरेका छन् । यसमा सबभन्दा धेरै समस्या कार्तिक आर्यन र कृति सेननको मुख्य भूमिका रहेको ‘शेहजादा’लाई पर्ने अनुमान गरिएको छ । किनकि शेहजादा अला वैकुन्ठपुरमलोकै हिन्दी रिमेकका रूपमा बनिरहेको फिल्म हो । यो फिल्म सन् २०२२ नोभेम्बरमा रिलिज हुने भनिएको छ ।
बलिउड विश्लेषक रमेश बालाले भने शेहजादालाई अला वैकुन्ठपुरमलोको हिन्दी संस्करणले खास प्रभाव नपार्ने बताएका छन् ।
बालाका अनुसार अला वैकुन्ठपुरमलो ठूलो स्तरमा रिलिज हुन लागेको होइन । यो फिल्मका मुख्य टोलीले अनुगमन पनि गर्दैनन् भन्ने उनको अनुमान छ । उनले भनेका छन्, ‘यसले कार्तिक आर्यनको फिल्मलाई खास असर नपार्ला । शेहजादा र अला वैकुन्ठपुरमलोका हिरो नै फरक छन्, हिरोइन फरक छन् र गीत फरक हुनेछन् ।’ उनले अल्लु अर्जुनको चर्चा बढिरहेका बेला थप कमाइ होस् भनेरमात्र अला वैकुन्ठपुरमलो रिलिज गर्न लागेको पनि बताएका छन् । अर्का फिल्म समीक्षक तरन आदर्श भने यसमा सहमत छैनन् । शेहजादालाई दर्शकले अला वैकुन्ठपुरमलोसँग तुलना गर्ने भएकाले प्रभाव पर्ने उनले बताएका छन् ।
अल्लुका प्रशंसक र लोकप्रियता पछिल्लो समय अझै धेरै बढेको भन्दै उनले भनेका छन्, ‘पुष्पाले पूरै भारतीय फिल्म उद्योगमा तहल्का मच्चाइसकेको छ । हलिउड फिल्म स्पाइडर म्यानः नो वे होमलाई समेत पछि पारिदियो । अब अल्लु अर्जुनको अला वैकुन्ठपुरमलो हिन्दी भाषामा डब भएर आउँदैछ । अहिले बजारमा नयाँ फिल्म पनि छैनन् । यो मौकामा अला वैकुन्ठपुरमलोले सफलता पाउने सम्भावना धेरै छ ।’ पुष्पा फिल्मले सबै भाषामा गरी ३ सय २५ करोड भारूभन्दा बढी कमाइसकेको बताइएको छ ।
