काठमाडौं — म्युजिक भिडियो निर्देशन कहलिएका युगल पोमू लिम्बू आफैँ मोडलिङ गर्न थालेका छन् । पछिल्लो समय उनी पूर्वेली लोकभाका बोलको ‘सिँगौरी–४’मा आफैँ छमछम नाचेका छन् ।
झण्डै एक दशकदेखि अरुलाई नचाउँदै आर्एका युगललाई ‘सिँगौरी–४’मा भने कमल राईले नचाएका छन् । उक्त गीतको भिडियोमा युगलसँगै अभिनेत्री केकी अधिकारी लिम्बू भेषभूषामा देखिएकी छन् । गीतको भावअनुसार केकीलाई लिम्बु कल्चरमा प्रस्तुत गरिएको निर्माण पक्षले जनाएको छ । भिडियोमा अभिनेत्री केकी र युगलको अनस्क्रिन रोमान्स गज्जब देखिएको छ ।
त्रिकोणात्मक प्रेम रोमान्समा आधारित भिडियोमा युगल र केकीका अलावा ह्यारी योन्जनको पनि अभिनय रहेको छ । शशी गुरुङ वाङदेलको शब्द तथा लय संकलन रहेको ‘सिँगौरी’को यो चौथो संकरण हो । यस संस्करणको कपिराइट्स लिएर युगल पोमो लिम्बूले भिडियो निर्माण गरेका हुन् । उक्त भिडियोमा छिरिङ शेर्पाको श्रृंगार तथा केश विन्यास, सुक्निता चौलागाइँको ड्रेस, सुमित गुरुङको कोरियोग्राफी, उत्सव दाहालको सिनेमाटोग्राफी र अनिलकुमार महर्जनको सम्पादन रहेको छ । गीतमा नविन राई र सुनिता थेगिनको स्वर रहेको छ ।
