काठमाडौं– पछिल्लो साता मुलुकभर कोरोनाभाइरस संक्रमित हुनेको संख्या निरन्तर घट्दै गएको छ । स्वास्थ्य जना जनसंख्या मन्त्रालयले दैनिक रूपमा सार्वजनिक गरेको विवरणको तुलनात्मक अध्ययनमा संक्रमणदर घट्दै गएको देखिएको हो । मन्त्रालयका अनुसार पछिल्लो २४ घन्टामा १ हजार ३८६ जनामा संक्रमण पुष्टि भएको छ भने सोही अवधिमा ८ हजार ७०४ जना संक्रमणमुक्त भएका छन् ।
यसअघि शनिबार १ हजार ७१४ जनामा कोरोना संक्रमण पुष्टि भएको थियो भने शुक्रबार २ हजार ५२६ जनामा संक्रमण पुष्टि भएको थियो । यस्तै बिहीबार ३ हजार १७५ जना, बुधबार ३ हजार ६३७, मंगलबार ५ हजार ५८३, सोमबार ५ हजार २९२ र आइतबार ३ हजार ५४० जनामा संक्रमण पुष्टि भएको थियो । यस्तै पछिल्लो २४ घन्टामा ११ जनाले कोरोनाबाट ज्यान गुमाएको मन्त्रालयले जनाएको छ । हाल देशभर कोरोनाको सक्रिय संक्रमित ४५ हजार २४८ जना रहेका छन् ।
सोमबारदेखि फाइजरको दोस्रो डोज
कोभिड–१९ विरुद्ध सोमबारदेखि काठमाडौं महानगरपालिकामा बालबालिकालाई फाइजर खोपको दोस्रो डोज लगाइने भएको छ । जिल्ला खोप समन्वय समितिको निर्णयअनुसार २४ माघदेखि ५ फागुनसम्म फाइजरको दोस्रो डोज लगाइने महानगरपालिकाले जनाएको छ । १२ देखि १७ वर्षसम्मका बालबालिकालाई फाइजरको दोस्रो डोज लगाइने महानगरको स्वास्थ्य विभाग प्रमुख बलराम त्रिपाठीले बताएका छन् । महानगरका सबै वडामा शनिबार बाहेक सबै दिन बिहान १० देखि अपराह्न ४ बजेसम्म खोप लगाइने भएको छ । यसका ३२ वटै वडामा खोप केन्द्र तोकिएको छ ।
फाइजरको पहिलो डोज लगाएको २१ दिन पूरा भएका बालबालिकाले खोप लगाउन सकिने स्वस्थ्य विभागले जनाएको छ । यसका लागि पहिलो डोज लगाएको खोप कार्ड बोकेर नजिकको खोप केन्द्रमा जान महानगरले अनुरोध गरेको छ । यसका लागि महानगरले सबै वडा कार्यालयलाई परिपत्र गरेर स्वास्थ्य मापदण्डको पूर्ण पालना गरी खोप लगाउन निर्देशन दिएको छ ।
जोरबिजोर हटाउन सिफारिस
कोभिड–१९ संकट व्यवस्थापन केन्द्र, कोभिड–१९ निर्देशक समिति (सिसिएमसी)ले यातायातमा लागू गरेको जोरबिजोर प्रणाली हटाउन सिफारिस गरेको छ । आइतबार सिसिएमसीले सार्वजनिक सवारीसाधनमा कायम जोरबिजोर प्रणाली हटाउन गृह मन्त्रालयलाई सिफारिस गरेको हो ।
