काठमाडौं– ‘सि.सं. २८ ‘कमाण्ड तथा स्टाफ तालिम’का शिक्षार्थी अधिकृतहरूले बिहीबार सशस्त्र प्रहरी बल नेपालको प्रधान कार्यालय अवलोकन भ्रमण गरेका छन् ।
भ्रमणका अवसरमा सशस्त्र प्रहरी नायब महानिरीक्षक नारायणदत्त पौडेलले अवलोकन तथा भ्रमणमा सिकेका ज्ञान, कला र कौशलले कार्यक्षेत्रमासमेत महŒवपूर्ण सहयोग पुग्ने बताउँदै जिम्मेवारी निर्वाहका क्षेत्रहरूमा नेपाली सेनालगायत अन्य सम्बद्ध निकायहरूसँगसमेत समन्वय र सहकार्य गर्दै नागरिकको सेवा तथा सुरक्षामा कटिबद्ध भइ परिचालन हुने विश्वास व्यक्त गरे ।
उनले भविष्यमासमेत यस्ता समन्वय, सहकार्य र भ्रमण निरन्तर रूपमा सञ्चालन हुने विश्वास व्यक्त गर्दै शिक्षार्थी अधिकृतहरूलाई तालिम सफलताको शुभकामना दिए । सोही अवसरमा कायम मुकायम सशस्त्र प्रहरी वरिष्ठ उपरीक्षक किरण बस्नेत तथा भ्रमणको नेतृत्व गरेका प्रमुख सेनानी झविन्द्रबहादुर रेश्मी मगरले एक आपसमा मायाको चिनो आदानप्रदान गरे ।
सोही अवसरमा सशस्त्र प्रहरी उपरीक्षक रवीनराज कर्णजितले सशस्त्र प्रहरी बल, नेपालको पृष्ठभूमि, परिचालनका क्षेत्रहरू, सांगठनिक संरचना, सुरक्षा चुनौतीलगायतका विविध विषयहरूमा प्रस्तुतीकरणमार्फत् जानकारी गराए । प्रशिक्षार्थी अधिकृतहरूले सशस्त्र प्रहरी बल नेपालको बारेमा राखेको विविध जिज्ञासाहरूबारे उनले प्रस्ट पारेका थिए ।
प्रशिक्षार्थी अधिकृतहरूले विपद् व्यवस्थापनमा सशस्त्र प्रहरी बल, नेपालले प्रयोगमा ल्याएको विविध सामग्रीहरूको अवलोकनसमेत गरे ।
उक्त तालिममा नेपाली सेना, सशस्त्र प्रहरी, नेपाल प्रहरी, राष्ट्रिय अनुसन्धान विभाग तथा बंगलादेश, पाकिस्तान, नाइजेरिया, कोरिया, लेबनान, श्रीलंका, बेलायत, भारत, माल्दिभ्स र मलेसियाका गरी कूल ७२ जना प्रशिक्षार्थी अधिकृतहरू सहभागी रहेको जानकारी दिइएको छ ।
