काठमाडौं –शहीद स्मारक ए डिभिजन लिग फुटबल प्रतियोगितामा जावलाखेल युथ क्लबले हिमालयन शेर्पा क्लबलाई पराजीत गर्दै विजयी भएको छ । त्रिपुरेश्वरस्थित दशरथ रङ्गशालामा भएको खेलमा जावलाखेलले आज हिमालयनलाई २–१ गोल अन्तरले पराजीत गर्दै विजयी भएको हो ।
रुपबहादुर लामा एक गोल र ओन्गुना जुनियरले थप एक गोले जावलाखेलको जीत भएको हो । खेलको ८८औँ मिनेटमा ओन्गुनाले गोल गर्दै जावलाखेललाई २–१ को जीत दिलाएका हुन् । अमृत श्रेष्ठले हिमालयन शेर्पाका तर्फबाट एक गोल फर्काएका थिए ।
खेलको १५औँ मिनेटमा रुपबाहनुरले पहिलो गोल गर्दै जावलाखेललाई सुरुआती अग्रता दिलाएकामा ७१औँ मिनेटमा हिमालयनका खेलाडी अमृतले गोल गर्दै खेललाई १–१ गोलको बराबरीमा ल्याएका थिए ।
यस जीतसँगै जावलाखेल रेलिगेसन जोनबाट जोगिएको छ । जावलाखेलले १२ खेलमा १४ अंक जोडदै अंक तालिकाको दशौँ स्थानमा उक्लेको छ । समान १२ खेल खेलेको हिमालयनले १३ अंक जोडेको छ ।
