काठमाडौं– नेपाल एएफसी एसियन कप छनोट अन्तर्गत तेस्रो चरणमा समूह ‘ए’ मा परेको छ । एसियन फुटबल कन्फेडेरेसन (एएफसी) ले बिहीबार सार्वजनिक गरेको ‘ड्र’ मा नेपाल समूह ‘ए’ मा परेको हो ।
नेपाल रहेको समूहमा कुवेत, इन्डोनेसिया र जोर्डन रहेका छन् । नेपाल सहभागि हुने समूहको छनोट चरणका खेलहरु कुवेतमा आयोजना हुने छन् । एएफसीले छनोटमा सहभागी २४ टोलीलाई ६ समूहमा विभाजन गरेको हो । हरेक समूहका शीर्ष टोली र ५ समूहको उत्कृष्ट दोस्रो टोली चीनमा आयोजना हुने एसियन कप २०२३ मा छनोट हुने छन् । छनोट खेलहरु जुन ८ देखि १४ सम्म सञ्चालन हुनेछन् ।
