ताप्लेजुङ - ताप्लेजुङको सदरमुकाम फुङलिङस्थित कोप्चे बजारमा आगलागी भएको छ । फुङलिङ नगरपालिका–४ कोप्चेमा आज बिहान आठ बजेतिर आगो लागेको स्थानिय प्रहरीले जनाएकाे हो ।
आगोले दुई वटा घरमा क्षति पुगेको र नियन्त्रणको प्रयास भइरहेको प्रमुख जिल्ला अधिकारी महेशकुमार पोखरेलले जानकारी दिएका हुन् ।‘बीच बजारमा आगो लागेकाले थप क्षति नहोस् भनेर अन्य दमकल झिकाउने गरी तयारी गरेको छ,’ प्रजिअ पोखरेलले भने । नगरपालिकाको दमकलको सहयोगमा सेना, सशस्त्र र नेपाल प्रहरीको टोली आगो निभाउन खटिएको उनले बताएका छन् ।
आगलागीमा परी घाइते भएकी मैवाखोला गाउँपालिका घर भई शिव मादेनको घरमा डेरा गरी बस्नेत ६७ वर्षीय वृद्धा चुलीमाया लिम्बूको उपचारका क्रममा मृत्यु भएको छ । उनकाे जिल्ला अस्पताल ताप्लेजुङमा निधन भएको प्रजिअ पोखरेलले जानकारी दिएका छन् ।
उनकाअनुसार आगलागीबाट शिव मादेनको घर पूर्णरूपमा जलेको छ भने रवीन्द्र लिम्बूको घरमा आंशिक क्षति पुगेको छ ।मासु पसल नजिकैको एक घरबाट अचानक आगलागी सुरु भएको थियो । जस्ताले छाएको घरमा आगलागी भएका कारण आसपासका घरसमेत जोखिममा परेका छन् । ताप्लेजुङ हरेक वर्ष आगलागीको चपेटामा पर्दै आएको छ ।
